Hëtztwell am Mee: Och zu Lëtzebuerg aussergewéinlech waarm
A sämtlechen europäesche Länner goufen Temperaturrekorder fir de Mount Mee gebrach, zum Beispill a Frankräich an a Groussbritannien. Och zu Lëtzebuerg war et aussergewéinlech waarm fir e Mount Mee, mat Temperaturen iwwer 30 Grad. De staatleche Wiederdéngscht MeteoLux hat dowéinst fir e puer Deeg hannerteneen eng giel Warnung wéinst Hëtzt erausginn. Dat ass déi niddregst vun den dräi Warnstufen. D‘Leit goufen opgeruff, sech virun der Hëtzt ze schützen, genuch ze drénken a physesch Aktivitéiten dobaussen esou gutt wéi méiglech ze evitéieren.
An engem Interview mam Radio 100,7 huet de Luca Mathias vu MeteoLux erkläert: D‘Temperaturen hei am Land louchen 10 Grad iwwer den Duerchschnëttstemperature vum Mount Mee.
Klimatologe weltwäit hunn hirersäits widderholl: Wéinst der Klimaerwiermung, déi vu Mënsche verursaacht gëtt, ginn Hëtztwelle mat grousser Warscheinlechkeet an Zukunft méi heefeg, méi laang a méi intensiv.
Stauséi: Groussen Undrang fir Schwammen ze goen
Um Stauséi war wéinst de waarmen Temperaturen déi lescht Deeg natierlech vill lass. De Stauséi, am Norde vum Land, ass eng beléifte Plaz zu Lëtzebuerg fir schwammen ze goen. Mee fir d‘Stauséi-Gemengen a fir d‘Police ass et all Joer eng Erausfuerderung, fir d‘Mass vu Leit ze geréieren. Ee Problem ass zum Beispill d‘Parken, well vill Leit mam Auto op de Stauséi kommen. An ëmmer nees ginn et Leit, déi hiren Auto op Plazen histellen, wou et net erlaabt ass. D‘Police huet iwwer de verlängerte Päischtweekend da 87 Protokoller wéinst falschem Parken um Stauséi verdeelt.
Iechternach: Dausende Leit op der Sprangpressessioun
Trotz der Hëtzt war zu Iechternach wéi all Joer um Péngschtdënschdeg nees d‘Sprangpressessioun. Dës weltbekannte chrëschtlech reliéis Prozessioun ass eng vun de bedeitendsten Traditiounen zu Lëtzebuerg. A si gehéiert zënter 2010 zum immaterielle Kulturierwe vun der Mënschheet vun der UNESCO.
Och dëst Joer sinn nees Dausende Gleeweger a sougenannte "Sprénger" duerch d‘Stroosse vun Iechternach gezunn. Bei der Prozessioun sprangen d‘Leit ëmmer zwee Schrëtt no vir, an ee Schrëtt no hannen. All Joer kommen och vill Pilger aus dem Ausland fir d‘Sprangpressessioun op Iechternach.
Wéinst Inflatioun: Plus 2,5 Prozent bei Salairen a Pensiounen
Leit, déi zu Lëtzebuerg schaffen oder eng Pensioun kréien, kréie méi Suen.
D‘Salairen a Pensioune ginn nämlech op den 1. Juni ëm 2,5 Prozent gehéicht. Op deem Dag erfält nämlech eng sougenannten Indextranche, huet d‘Statistikamt Statec confirméiert.
Eng Indextranche erfält, wann d‘Inflatioun, also d‘Präisser, klammen an e gewëssene Punkt erreechen. Deen Ament ginn d‘Salairen a Pensiounen zu Lëtzebuerg dann automatesch ëm 2,5 Prozent no uewen ugepasst.