De Sample vun der Woch
Led Zeppelin - When the Levee Breaks
11 min
Led Zeppelin war eng brittesch Rockband. Gegrënnt 1968, mat 300 Milliounen verkaaften Alben, ass et eng vun den erfollegräichste Bands iwwerhaapt. Den Doud vum Drummer John Bonham am September 1980 markéiert d'Enn vun der Band, déi kontinuéierlech an der selwechter Opstellung mam Sänger Robert Plant, Gittarist Jimmy Page a Bassist John Paul Jones aktiv war. Musikalesch war Led Zeppelin ee vun de Pionéier vum Hard Rock, Blues Rock, Progressive Rock an dem Heavy Metal, dee gewuess ass, huet awer och Aflëss aus dem Folk mat agebonnen. "When the Levee Breaks" ass e Blues Lidd vun 1929, mee Led Zeppelin huet dem Lidd 1971 en neien Touch ginn. Si hunn Deeler vun den Texter geännert, an et an "en hypnotesche Blues-Rock Mantra" ëmgewandelt. Hir siwe-Minutte-Reeditioun vum Lidd ass am Beschte bekannt wéinst dem John Bonham sengem eenzegaartegen Drumpart, opgeholl an engem Trapenhaus am Hampshire an England. Fir d'Atmosphär vun enger ënnergaangener Welt ze simuléieren huet de Jimmy Page vu Led Zeppelin verschidde Produktiounstricke benotzt, dorënner Echo, hannerrécks gespillten Harmonika, a méi lues gespillte Spueren. Led Zeppelin huet d'Lidd 1971 als lescht Stéck op hirem véierten Album erausbruecht, dee sech Millioune Mol verkaaft huet. Dësen Album definéiert net nëmmen de Led Zeppelin Sound, mee dee vum ganzen Hard Rock aus de 70er. Wéinst der komplexer Produktioun huet d'Band d'Lidd nëmme seele live gespillt. "When the Levee Breaks" gouf direkt bei senger Sortie vun der Kritik gelueft.
D'Lidd gouf iwwer 220 Mol gesampelt. E klassescht Beispill sinn d'Beastie Boys mat hirem "Rhymin & Stealin", dat 1986 op hirem éischten Album "Licensed to Ill" war. Den Titel hate si zesumme mam Rick Rubin komponéiert.
Den Titel gouf dacks an anere Rap Lidder gesampelt, mee erstaunlecher Weis och vu Coldcut, um witzege "More Beats + Pieces". Si mixen déi bombastesch Drums vu Led Zeppelin hei mam Prokofiev sengem "Peter und der Wolf".
Mee dem Bobby Bieles seng Liblingsversioun ass déi vun der Björk am Joer 1993. Si sampelt "When The Levee Breaks" fir hiren "Army of Me" doraus ze maachen, dat war op hirem zweeten Album "Post".
Episoden
Deniece Williams - Free
Der Deniece Williams hir véier-Oktaven-Sopranstëmm huet si zu engem vun de markantsten Talenter vun der Soul Ära gemaach.
Marvin Gaye - After the Dance
Dem Marvin Gaye säi 14. Studio-Album, ee ganz gelongenen Nofollger vu "Lets Get It On". De Stil kann een als fréien Disco Konzept-Album bezeechnen.
Otis Redding - Try A Little Tenderness
Dem Otis Redding seng Interpretatioun vum Lidd "Try A Little Tenderness"
Sly & the Family Stone - Sing a Simple Song
Ee vun de bekanntste Breaks, déi am Hip-Hop gesampelt goufen: op ganze 462 Lidder.
Dorothy Ashby - The Windmills of your Mind
Dëst Lidd war ursprénglech eng franséisch Chanson vum Michel Legrand an huet "Les moulins de mon cœur" geheescht. Et gouf vu villen Artiste gecovert.
Herbie Hancock - Watermelon Man
Dem Hancock seng 12. LP (1972) brécht d'Barriären tëschent Jazz, Funk a Rock, bréngt den Jazz-Fusion Genre an den Mainstream a säi kënschtlereschen a kommerziellen Duerchbroch.
Kool & the Gang - Little Children
Kool & the Gang sinn eng vun de bekanntste Funk Bands vun de 70er an R'n'B Gruppe vun den 80er an hu mat hiren 23 Albumen a 70 Maxien iwwer 70 Millioune Placke verkaf.
Curtis Mayfield - Move On Up
D'Lidd vun 1970, ronn néng Minutte laang, war ursprénglech kee mega Hit, mee gouf mat de Jore méi bekannt.
Shocking Blue - Love Buzz
Shocking Blue, en hollännesche Quartett, war eng erfollegräich psychedelesch Rock-Grupp an de 70er an hunn iwwer zéng Millioune Placken insgesamt verkaf.
Charles Bradley - The World
Den Charles Bradley aka "The Screaming Eagle of Soul" huet laang gebraucht fir bekannt ze ginn, a säi Glanz huet och leider just kuerz gedauert.
Billy Cobham - Stratus
De Billy Cobham gëtt generell als de beschten Drummer vum Jazz Fusion Genre ugesinn.
Goblin - Suspiria
Goblin ass eng italieenesch Prog Rock Band. Déi meescht vun hiren Albume si Soundtracks fir Horrorfilmer, déi gréisstendeels vum Dario Argento gemaach goufen.
Jean Claude Vannier - Les gardes volent au secours du roi
Dem Jean Claude Vannier säin Afloss als Komponist, Arrangeur, Dirigent oder Produzent ass bei der franséischer Chanson a Filmmusek quasi net ewech ze denken.
Jean-Luc Ponty - Farewell
De franséische Museker, 1942 an der Normandie gebuer, spillt fréi am Philharmoneschen Orchester zu Paräis, éier hie seng Gei a verschiddenen Jazz Bands integréiert.
David Bowie - Let's Dance
Den David Bowie ass ee vun de berüümtste Museker vum 20. Joerhonnert mat iwwer 100 Millioune verkaaften Albumen. "Let's Dance", säi 15. Album, kënnt 1983 eraus.
The Beatles - Glass Onion
Jiddweree kennt de Beatles hire "White Album". Vill Leit kennen dem Jay-Z säi "Black Album". Wat kënnt eraus, wann ee Schwaarz a Wäiss mëscht? Gro natierlech.
Heatwave - The Star of a Story
Heatwave war eng Funk-Disco Band, déi 1975 entstanen ass. "The Star Of A Story" ass op hirem zweeten Album "Central Heating".
Fabio Frizzi - The Beyond
Deen italieenesche Filmdirekter Lucio Fulci huet 1981 ee vu senge Meeschterwierker erausbruecht, dee kultesche Film "The Beyond" mam Soundtrack komponéiert vum Fabio Frizzi.
Minnie Riperton - Lovin You
Der Minnie Riperton hiert Lidd "Lovin You" koum 1975 eraus a war op hirem Album "Perfect Angel".
