De Sample vun der Woch
Samuel Jonathan Johnson - My Music
9 min
Den Johnson huet mat 14 Joer ugefaangen Uergel ze spillen. Bannent e puer Méint war hien dee jéngsten Uergelspiller vu senger Kierch. Wéi hie 16 Joer al war, ass d'Famill op New York geplënnert, wou hie fir verschidden aner Kierche gespillt huet. Hie gouf séier bekannt als ee vun de beschten Uergelspiller vun der Stad. Mat 19 Joer entdeckt hien an der Arméi mat e puer eeleren Zaldoten den Jazz an e puer Méint méi spéit spillt hien och schonn Jazz a verschiddene Bare mat de Kolleegen.
Zeréck zu New York spillt hie weider fir Kierchen a komponéiert Lidder fir si, bei deenen hien Jazz-Akkorde mat Gospel fir en eenzegaartege Stil vermëscht. Duerno grënnt den Johnson d'Grupp Spontaneous Combustion, déi Support Band fir e puer grouss Nimm gëtt, zum Beispill d'Jackson 5! Kuerz drop huet hien dann 1978 säin éischte Solo Album fir Columbia Records opgeholl: "My Music". Den Album hat just bësse kommerzielle Succès an Europa, mee koum guer net an den USA un. Déi meescht Insider si sech eens fir ze soen, datt den Johnson senger Zäit viraus war. No dëser Enttäuschung méicht hien och klenge Break an der Museksindustrie. 20 Joer drop erreecht den Album Kultstatus a gëtt vun de beschten Hip-Hop-Produzente gesampelt. Den Johnson seet selwer "Ech héieren dacks mäi Stil a Sound, deen um Radio oder am Fernsee gesampelt gëtt ..., an ech si geéiert, datt d'Hip-Hop-Kultur "My Music" benotzt huet!" Säi Stil kann een als hallef romantesch Disco à la Barry White bezeechnen an deelweis och als smoothen Jazz mat Donald Byrd a Roy Ayers Aflëss.
The Alchemist benotzt den Titeltrack vum Album fir de kultesche "We Gonna Make It" vum amerikanesche Rapper Jadakiss featuring Styles P vu The Lox ze produzéieren. Dat war op sengem éischten Album "Kiss tha Game Goodbye" vun 2001. De Beat war ursprünglech fir de Ras Kass geduecht, mee wéinst interne Konflikter koum deen ni offiziell eraus.
2009 benotzt de Skero aus Éisträich dee selwechte Sample bëssen op ironesch Manéier. Hie gëtt begleet vum Kamp MC. Den Titel heescht "Fuss vom Gas" a schwätzt vu Vëloen.
Episoden
Soft Machine - Drop
Soft Machine ass eng englesch Band vun 1966. Hire Sound geet vu progressivem Rock bis Jazz Fusion. 1972 kënnt hire fënneften Album eraus mam Titel "5".
Brick - Dazz
"Good High" ass deen éischten Album vun der Grupp Brick, 1976 bei Bang Records erauskomm.
Bernard Wright - Who Do you Love
Den Bernard Wright bréngt 1985 dëst wonnerbaart Lidd eraus um Album "Mr. Wright". Hien huet viru senger Solokarriär mat Leit wéi Miles Davis oder Cameo opgeholl.
Teena Marie - Square Biz
D'Teena Marie war eng amerikanesch Singer-Songwriterin, déi vun 1956 bis 2010 gelieft huet. Si hat grousse Succès a gouf och "The Ivory Queen of Soul" genannt.
James Brown - Funky President (People It's Bad)
Et ass schwéier eng Sendung iwwer Samplen ze maachen ouni den James Brown ze erwänen. Hien ass dee meeschtgesampelte Kënschtler vun allen Zäiten.
The O'Jays - For the Love of Money
Déi amerikanesch R'n'B Grupp aus Ohio bréngt d'Lidd 1974 eraus.
Taana Gardner - Heartbeat
1981 erauskomm an eng vun deene beschte Pop-Single vun den 80er Joren
David Axelrod - The Sign
Den David Axelrod kënnt vu Los Angeles a gouf dacks gesampelt. Hie war eigentlech Soundtechniker an huet vill Gruppen opgeholl.
Mulatu Astatke - Kasalefkut-Hulu
De Mulatu Astatke ass e bunnbriechende Museker, deen 1945 an Äthiopie gebuer gouf.
Rick James - Mary Jane
1978 kennt dem Rick James seng zweet Maxi "Mary Jane" eraus.
Tom Tom Club - Genious of Love
Déi zweet Maxi vum éischten Album vun Tom Tom Club koum 1981 eraus. Den Album huet och "Tom Tom Club" geheescht an ass eng puer Goldgrouf u Samplen.
Meena Kapoor - Chandhi Ka Badan
1963 kënnt den historeschen Hindi Film "Taj Mahal" mam Lidd "Chandhi Ka Badan" eraus, ausserhalb vun Indie gréisstendeels onbekannt, mee als Bollywood Musical e grousse Succès.
Dennis Edwards & Siedah Garrett - Don't Look Any Further
Dem Soul an R&B Sänger säi gréissten Hit (1984) als Solo-Artist
Al Green - I'm Glad You're Mine
Ee vun den bekanntsten Drum Loops aus dem Hip-Hop, 1972 erauskomm, staamt vum Al Green, Soul- an Gospel Sänger.
Art of Noise - Moments In Love
1983 huet déi englesch experimentell Grupp, bekannt fir hir Sound-Collage-Techniken an hir avantgardistesch Approche dozou, dëst Lidd erausbruecht.
Marvin Gaye - Inner City Blues (Make Me Wanna Holler)
1971 kënnt dëst Meeschterwierk hei eraus "Inner City Blues (Make Me Wanna Holler)" vum Sänger Marvin Gaye.
Grover Washington Jr. - Just The Two Of Us (Feat. Bill Withers)
1981 bréngt ee vun den bekanntsten Jazz-Saxofon-Spiller vun der Welt a Grënner vun der Smooth Jazz Branche dëst Lidd eraus.
Barry White - I'm Gonna Love You Just A Little More, Baby
Eng vun deene meescht gesampelte Perkussiounen am Hip-Hop
The Mohawks - The Champ
Ee vun de meescht gesampelten Songs iwwerhaapt, laut Google waren et 728 Mol. D'Lidd ass selwer e Cover vum Song "Tramp" vum Lowell Fulsom.
