De Sample vun der Woch
Barry White - I'm Gonna Love You Just A Little More, Baby
0 min
Eng vun deene meescht gesampelten Perkussiounen am Hip-Hop ass d'Lidd "I'm Gonna Love You Just A Little More, Baby". De Barry White gouf 1944 am Texas gebuer, mee ass zu Los Angeles grouss ginn. Hien huet sech als Kand de Piano selwer bäibruecht an huet scho mat eelef Joer semiprofessionell Piano am Studio opgeholl. Hien hat e puer kleng Bands wärend senger Teenager Zäit, an no enger bëssen heikler Jugend an engem Besuch am Prisong, schafft hie sech ëm 1960 als Studio-Museker a Komponist erop. Hien ass Songwriter fir Leit wéi Felice Taylor, Viola Wills oder The Bobby Fuller Four. Hien huet ënner anerem d'Girl-Grupp Love Unlimited entdeckt, déi hie fir d'éischt selwer produzéiert an huet herno mat hinne gespillt. Hien huet esouguer eng vun de Sängerinne bestuet.
Wéi säi Produzent hien héieren huet dëst Lidd um Piano spillen, dat fir en anere Kënschtler virgesi war, huet hien e gezwongen, et selwer als Solo-Artist erauszebréngen. Dat war den Ufank vun enger eenzegaarteger Karriär an déi éischt Single vu sengem éischten Album. De Barry White schreift, spillt an hellt alles selwer op. Dat dote Lidd war en enorme Succès. Hien huet an Amerika méi wéi 500.000 Placken innerhalb vun dräi Méint verkaf. Op senger éischter Plack leet hien d'Fondatioune fir de Rescht vu senger Karriär. Et geet eigentlech nëmmen ëm Sex, mee an 1.000 Nuancen aus verschiddene Perspektiven erzielt. A seng 18 Albumen duerno ware mindestens genee esou erfollegräich. De Barry White ass 2003 gestuerwen, mee bleift, bësse wéi den Isaac Hayes, wéinst senger déiwer Stëmm a sengen eroteschen Texter an Erënnerung.
2010 mécht de Rick Ross dem White eng direkten Hommage mam Lidd "Even Deeper". Et war op senger Summer Mixtape: "Ashes to Ashes" ze fannen. De Rozay rappt iwwer Wodka, Bentley Autoen a Vacheron Aueren. Hie probéiert e bëssen den ultimative Swag vum Barry White nozemaachen, an ech fannen, e läit net ganz donieft.
De Kool Keith huet de Barry White och benotzt fir säi Lidd "Holy Water". Hei ass e Beispill, wéi de Sample op en anert Instrument transposéiert an nei gespillt gouf. De Kool Keith ass bekannterweis deen Hip-Hop-Kënschtler mat de meeschten Alteregos. Hien hat vill exzentresch Projeten, wéi zum Beispill Ultramagnetic MCs, Dr Octagon, Black Elvis, Diesel Truckers an nach vill anerer ... 2019 kënnt hie mat engem Album mam bescheidenen Titel "Keith" zeréck. Deen ass ganz produzéiert vu Psycho Les vun de Beatnuts. Hie liwwert hei eng konsistent Auswiel un new-school funky Titelen, wéi zum Beispill "Holy Water".
Nach e lescht Beispill, wéi ee just d'Drums vum Ufank vum Lidd sampele kann. De Sample ass méi séier gespillt a gouf an en UK Garage Lidd agebaut. Den DJ Zinc huet dat fir säin "138 Trek" Lidd gemaach. Den DJ Zinc ass eng vun den dreiwende Kräften aus England an ass vergläichbar mat aner DJs wéi zum Beispill den DJ Hype, op deem sengem Label True Playaz och dat heite Lidd erauskoum. Hien ass e Pionéier a ville Genren, wéi zum Beispill Drum'n'bass, Break Beat, 2 Step Garage oder House an trëtt nach bis haut ëmmer mat deem Lidd op.
Episoden
Samuel Jonathan Johnson - My Music
Den Johnson huet mat 14 Joer ugefaangen Uergel ze spillen a gouf séier bekannt als ee vun de beschten Uergelspiller an den New Yorker Kierchen. An der Arméi entdeckt hien den Jazz.
Tom Browne - Funkin' for Jamaica (N.Y.)
De Browne war ursprünglech u klassescher Musek interesséiert, mee huet den Jazz als Student Mëtt vun de 70er op der Uni entdeckt.
A Taste of Honey - Rescue Me
A Taste of Honey war eng amerikaneschen Disco-Soul-Grupp vu Los Angeles, déi 1972 vu Janice-Marie Johnson a Perry Kibble gegrënnt gouf.
One Way - Cutie Pie
One Way war eng amerikanesch R&B a Funk Band, déi an de spéiden 1970er an Ufank den 1980er Jore populär war, dirigéiert vum Al Hudson.
Melissa Morgan - Fool's Paradise
D'Joyce Melissa Morgan, kuerz Meli'sa genannt ass eng amerikanesche R&B a Soul Sängerin a Songwriterin.
Maze - Before I Let Go
Maze, och bekannt als Maze Featuring Frankie Beverly ass eng amerikanesch Soulband, déi vum Frankie Beverly zu Philadelphia am Joer 1970 gegrënnt gouf.
The Brothers Johnson - Tomorrow
The Brothers Johnson waren eng Funk-, Disco- an R'n'B-Band, déi vun 1975 bis 1982 aktiv war.
Quincy Jones - Summer in the City
De Quincy Jones, gebuer de 14. Mäerz 1933, ass en amerikanesche Plackeproduzent, Museker, Songwriter, Komponist, Arrangeur a Film- an Televisiounsproduzent.
Ramsey Lewis - Tambura
Deen amerikaneschen Jazzkomponist, Pianist a bekannte Radio-Moderator, 1935 zu Chicago gebuer, ass leschte September am Alter vu 87 Joer gestuerwen.
DeBarge - I Like It
DeBarge war eng amerikanesch Grupp aus Michigan, déi aus verschiddene Membere vun der DeBarge Famill bestanen huet, aktiv tëschent 1979 an 1989.
Joe Cocker - Woman to Woman
Deen englesche Sänger war fir seng rau a blueseg Stëmm a seng charismatesch live Optrëtter bekannt.
The Main Ingredient - Summer Breeze
Déi amerikanesch Soul a Funk Grupp The Main Ingredient gouf 1964 am Harlem, New York City gegrënnt.
Dynasty - Adventures in the Land of Music
An den 1980er war de Label Solar Records vergläichbar mat Motown a Stax an den 1960er oder Philadelphia International an den 1970er.
Sister Sledge - He's the Greatest Dancer
Sister Sledge ass eng amerikanesch Grupp an besteet aus den Schwësteren Debbie, Joni, Kim a Kathy Sledge.
The Time - 777-9311
De Grupp The Time ass en Niewenprojet vum Prince. All d'Musek an d'Texter si vun him geschriwwen, mee gi vu The Time live op der Bün interpretéiert.
Dionne Warwick - Walk On By
En Dosende Mol gecoverte Pop-Standard
Led Zeppelin - When the Levee Breaks
Gegrënnt 1968, mat 300 Millioune verkaaften Albe ware Led Zeppelin eng vun den erfollegräichste Bands iwwerhaapt.
Art of Noise - Moments In Love
1983 huet déi englesch experimentell Grupp, bekannt fir hir Sound-Collage-Techniken an hir avantgardistesch Approche dozou, dëst Lidd erausbruecht.
The Winstons - Amen, Brother
Den Amen Break huet ganz Generatioune vu Beatmaker erzunn a gouf iwwer 5.000 Mol wärend de leschten 30 Joer gesampelt.
