De Sample vun der Woch
Art of Noise - Moments In Love
10 min
1983 huet Art of Noise "Moments In Love" erausbruecht. Art of Noise ass eng englesch experimentell Grupp. Si si bekannt fir hir Sound-Collage-Techniken an hir avantgardistesch Approche dozou. Si si Pionéier an der Art Sampling mat traditionellem Songwriting ze vermëschen, dat Ganzt e lëschtege Pot-pourri. Hir Musek ass eng Fusioun vu ville Genrë wéi Hip-Hop, Rock, Jazz, R&B, traditionellem Pop an diverse Sounds. Si gläichen anere Kënschtler wéi Malcolm McLaren oder Jean-Michel Jarre zu där Zäit, mee mat enger méi rockeger Approche. Si sinn am Ufank meeschtens anonym mat Masken opgetrueden, si wollten d'Musek an den Vierdergrond setzen. D'Häerzstéck vun hirer Grupp war deen deemools ganz neie Fairlight Music Computer. Op hirer éischter EP "Into Battle With The Art Of Noise" setze si de Grondsteen fir vill aner Genren, déi eréischt méi spéit wäerten optauchen, natierlech Hip-Hop, mee och industriell Musek, Techno, oder souguer Breakbeat. Hire bekanntste Moment ass warscheinlech "Moments In Love". Et ass eng zéng Minutte sensuell instrumental Pop Ballade. Déi puer éischt Sekonne vun dësem easylistening Pop Song goufe laut Google 137 Mol gesampelt. All Genre huet dës Musek gesampelt, hei véier Beispiller vu Rap, Techno, Grime a souguer Screwed and Chopped.
Den DJ Screw huet säin "Tell Me Something Good" aus dësem Sample gemaach. Hien ass den Erfinder vum Screwed and Chopped Mix-Style, andeems et dorëms geet Lidder plus ou moins 30 Prozent méi lues ze spillen, wärend ee verschidde Scratch- a Mixtechnicken uwent fir d'Musek ze dekonstruéieren. Hien huet Honnerte vu Mixtapes ënner deem Konzept produzéiert. Et geet hei ëm eng gemixte Kompilatioun vum DJ Screw, déi "Bigtyme Vol II All Screwed Up" heescht. Et ass ee vu senge populäerste Mixtapen, an dëst Lidd ganz besonnesch: "Tell Me Something Good". Hie remixéiert hei en Originallidd vun UGK a benotzt dofir den Art Of Noize Sample, natierlech ganz erofgepitcht.
De Produzent Salaam Remi huet de Sample och benotzt, an zwar fir dem Biz Markie säi "Studda Step" ze produzéieren. Biz Markie ass ee vun den inventiivste Rapper aus der golden-age Hip-Hop Era, dat heescht vun Enn den 80er bis Ufank d'90er. Hien ass e witzegen, kreativen, talentéierten MC an Entertainer. Deen doten Titel huet et op keen Album geschafft, dofir ass en hei op senger éischter Best-of Kompilatioun "The Best Of Cold Chillin' Biz Markie", déi am Joer 2000 bei Cold Chillin' Records erauskoum.
En anert Beispill vun der Utilisatioun vum Sample ass d'Lidd vun Dj Godfather & Starski, "Moments", bei Databass Records aus Detroit erauskomm. Databass war ee vun de bescht organiséierte Labele wat Ghettotech an Bootyhouse ugeet. D'Lidd gouf eng Ghettotech Hymne Ufank den 2000er. Den DJ Godfather ass ee vun de Veterane vun dësem Subgenre. Ghettotech ass e bëssen den Nofollger vun der Miami Bass, gemëscht mat Techno Elementer. Dat Ganzt méi séier gespillt, bis zu 160 BPM!
Den DJ Spooky huet och eng Grime Versioun draus gemaach. Spooky ass ee vun de bekanntste Londoner Grime DJs. Hien huet all Méindeg seng Sendung GrimeyMondays beim engleschen Nationalradio. Hie schrauft de Sample op ganzer 70 BPM erof a mëscht en interessante Mix tëschent Grime an Trap.
Episoden
Soft Machine - Drop
Soft Machine ass eng englesch Band vun 1966. Hire Sound geet vu progressivem Rock bis Jazz Fusion. 1972 kënnt hire fënneften Album eraus mam Titel "5".
Brick - Dazz
"Good High" ass deen éischten Album vun der Grupp Brick, 1976 bei Bang Records erauskomm.
Bernard Wright - Who Do you Love
Den Bernard Wright bréngt 1985 dëst wonnerbaart Lidd eraus um Album "Mr. Wright". Hien huet viru senger Solokarriär mat Leit wéi Miles Davis oder Cameo opgeholl.
Teena Marie - Square Biz
D'Teena Marie war eng amerikanesch Singer-Songwriterin, déi vun 1956 bis 2010 gelieft huet. Si hat grousse Succès a gouf och "The Ivory Queen of Soul" genannt.
James Brown - Funky President (People It's Bad)
Et ass schwéier eng Sendung iwwer Samplen ze maachen ouni den James Brown ze erwänen. Hien ass dee meeschtgesampelte Kënschtler vun allen Zäiten.
The O'Jays - For the Love of Money
Déi amerikanesch R'n'B Grupp aus Ohio bréngt d'Lidd 1974 eraus.
Taana Gardner - Heartbeat
1981 erauskomm an eng vun deene beschte Pop-Single vun den 80er Joren
David Axelrod - The Sign
Den David Axelrod kënnt vu Los Angeles a gouf dacks gesampelt. Hie war eigentlech Soundtechniker an huet vill Gruppen opgeholl.
Mulatu Astatke - Kasalefkut-Hulu
De Mulatu Astatke ass e bunnbriechende Museker, deen 1945 an Äthiopie gebuer gouf.
Rick James - Mary Jane
1978 kennt dem Rick James seng zweet Maxi "Mary Jane" eraus.
Tom Tom Club - Genious of Love
Déi zweet Maxi vum éischten Album vun Tom Tom Club koum 1981 eraus. Den Album huet och "Tom Tom Club" geheescht an ass eng puer Goldgrouf u Samplen.
Meena Kapoor - Chandhi Ka Badan
1963 kënnt den historeschen Hindi Film "Taj Mahal" mam Lidd "Chandhi Ka Badan" eraus, ausserhalb vun Indie gréisstendeels onbekannt, mee als Bollywood Musical e grousse Succès.
Dennis Edwards & Siedah Garrett - Don't Look Any Further
Dem Soul an R&B Sänger säi gréissten Hit (1984) als Solo-Artist
Al Green - I'm Glad You're Mine
Ee vun den bekanntsten Drum Loops aus dem Hip-Hop, 1972 erauskomm, staamt vum Al Green, Soul- an Gospel Sänger.
Art of Noise - Moments In Love
1983 huet déi englesch experimentell Grupp, bekannt fir hir Sound-Collage-Techniken an hir avantgardistesch Approche dozou, dëst Lidd erausbruecht.
Marvin Gaye - Inner City Blues (Make Me Wanna Holler)
1971 kënnt dëst Meeschterwierk hei eraus "Inner City Blues (Make Me Wanna Holler)" vum Sänger Marvin Gaye.
Grover Washington Jr. - Just The Two Of Us (Feat. Bill Withers)
1981 bréngt ee vun den bekanntsten Jazz-Saxofon-Spiller vun der Welt a Grënner vun der Smooth Jazz Branche dëst Lidd eraus.
Barry White - I'm Gonna Love You Just A Little More, Baby
Eng vun deene meescht gesampelte Perkussiounen am Hip-Hop
The Mohawks - The Champ
Ee vun de meescht gesampelten Songs iwwerhaapt, laut Google waren et 728 Mol. D'Lidd ass selwer e Cover vum Song "Tramp" vum Lowell Fulsom.
