De Sample vun der Woch
Ramsey Lewis - Tambura
7 min
Deen amerikaneschen Jazzkomponist, Pianist a bekannte Radio Moderator, 1935 zu Chicago gebuer, ass leschte September am Alter vu 87 Joer gestuerwen. De Lewis huet iwwer 80 Albumen opgeholl, fënnef Goldplacke an dräi Grammy Awards a senger Karriär. Dem Lewis säin éischten Duerchbroch war mat senger poppeger instrumentaler Interpretatioun vum Lidd "The In Crowd" vun 1965. Mat där Single war hien ee vun den erfollegräichsten Jazzpianiste vun den USA. No senge klasseschen akusteschen Albumen an den 1960er Jore mam Ramsey Lewis Trio, bei deem och de Maurice White zäitweis derbäi war, wollt de Lewis an de 1970er an eng nei musikalesch Richtung goen. Mëtt vun de 70er huet hie sech nees mam Maurice White zesummegedoen, deen deemools mat senger eegener Band Earth, Wind & Fire ënnerwee war. Fir den Album "Sun Goddess" spille Membere vun Earth, Wind & Fire d'Musek, wärend de Philip Bailey Gesang bäigefüügt huet. Den Album gouf e grousse Crossover Hit, deen et op Plaz 1 vun de Billboard R&B an Jazz Album Charts gepackt huet. A mam Lidd "Sun Goddess" huet hien et souguer an d'R&B-, Pop- an Disco-Charts gepackt. "Sun Goddess" gouf kuerz drop Gold zertifiéiert. Jorelaang war d'Identitéit vun der Fra um Albumcover, fotograféiert vum Herb Breuer, e Rätsel bei de Fans, well et kee Kredit um Albumcover gouf. De Lewis huet op senger Facebook-Säit am Juni 2011 verroden, datt et de Model Susan Leigh Scott war.
D'Lidd "Tambura" gouf eng gutt Dose Mol am Hip-Hop gesampelt, ënner anerem vum mëttlerweil weltbekannte Produzent El-P vun der Grupp Run The Jewels. Fréier hat de gudde Mann eng Grupp, déi Company Flow geheescht huet, a si waren an den 90er Leader fir alles, wat underground Hip-Hop zu New York ugeet. Si haten e puer Hits um Label Rawkus, zum Beispill "Patriotism" oder "End To End Burners". Company Flow huet 1999 och een Instrumentalen Album erausbruecht, deen huet "Little Johnny From the Hospitul" geheescht. Do war d'Lidd "Linoleum" drop, dat dem Lewis säin "Tambura" sampelt.
Mr. Complex hat och ëm déi Zäit ee méi klengen Hit am Underground mat sengem minimalistesche "Visualize" op sengem Album "The Complex Catalog" am Joer 2000.
E lescht Beispill ass den Ex-Beatboxer vu The Roots, de Rahzel. Hie benotzt och déi éischt Nout vum Lewis sengem Lidd fir säin "Bubblin, Bubblin" doraus ze maachen. Dat war op sengem Album "Make the Music 2000" vum Joer 1999.
Episoden
Kalyanji Anandji - Dharmatma Theme Music
Mir sinn nees am Bollywood vun de 70er Joren a schwätzen iwwer d'Musek vum Film "Dharmatma".
Arawak - Accadde A Bali
Arawak ass en italieenesche Museksprojet vum verstuerwene Benito Simoncini, en italieenesche Pianist, Arrangeur an Dirigent, a Komponist fir Radio an Televisioun.
Roy Ayers - The Memory
De Roy Ayers ass ee vun de bekanntste Vibrafonisten zanter den 1960er Joren. Säi Ruff ass dee vun engem Prophéit vum Jazz-Funk an Acid Jazz, e Mann, Jore viru senger Zäit.
Incredible Bongo Band - Apache
Niewent dem Think-Break an dem Amen-Break, ass den Apache-Break eng vun den beléiftste Perkussiounen am Hip-Hop.
Donald Byrd - Wind Parade
Den Donald Byrd gouf als ee vun de beschten Trompettisten vu senger Zäit ugesinn. Vu Mëtt de 50er bis Mëtt 60er huet hie vill opgeholl, meeschtens fir Blue Note.
Deniece Williams - Free
Der Deniece Williams hir véier-Oktaven-Sopranstëmm huet si zu engem vun de markantsten Talenter vun der Soul Ära gemaach.
Earth, Wind and Fire - Shining Star
"That's the Way of the World"ass dee sechste Studioalbum vun der amerikanescher Band an och de Soundtrack vum Film mam selwechten Numm.
Sly & the Family Stone - Sing a Simple Song
Ee vun de bekanntste Breaks, déi am Hip-Hop gesampelt goufen: op ganze 462 Lidder.
Dorothy Ashby - The Windmills of your Mind
Dëst Lidd war ursprénglech eng franséisch Chanson vum Michel Legrand an huet "Les moulins de mon cœur" geheescht. Et gouf vu villen Artiste gecovert.
Herbie Hancock - Watermelon Man
Dem Hancock seng 12. LP (1972) brécht d'Barriären tëschent Jazz, Funk a Rock, bréngt den Jazz-Fusion Genre an den Mainstream a säi kënschtlereschen a kommerziellen Duerchbroch.
The Jimmy Castor Bunch - It's Just Begun
Den James Walter Castor war en amerikanesche Funk-, R&B- a Soulmuseker, Singer/Songwriter a Saxofonist, deen zu Manhattan, New York gebuer ass.
Curtis Mayfield - Move On Up
D'Lidd vun 1970, ronn néng Minutte laang, war ursprénglech kee mega Hit, mee gouf mat de Jore méi bekannt.
Shocking Blue - Love Buzz
Shocking Blue, en hollännesche Quartett, war eng erfollegräich psychedelesch Rock-Grupp an de 70er an hunn iwwer zéng Millioune Placken insgesamt verkaf.
Teena Marie - Square Biz
D'Teena Marie war eng amerikanesch Singer-Songwriterin, déi vun 1956 bis 2010 gelieft huet. Si hat grousse Succès a gouf och "The Ivory Queen of Soul" genannt.
Billy Squier - The Big Beat
Dräi Albume vum amerikanesche Rockmuseker, Joergank 1950, waren an den 80er an den amerikaneschen Top 10 Charts, an hien huet och e puer Hitsingelen erausbruecht.
Jean-Luc Ponty - Farewell
De franséische Museker, 1942 an der Normandie gebuer, spillt fréi am Philharmoneschen Orchester zu Paräis, éier hie seng Gei a verschiddenen Jazz Bands integréiert.
David Bowie - Let's Dance
Den David Bowie ass ee vun de berüümtste Museker vum 20. Joerhonnert mat iwwer 100 Millioune verkaaften Albumen. "Let's Dance", säi 15. Album, kënnt 1983 eraus.
The Beatles - Glass Onion
Jiddweree kennt de Beatles hire "White Album". Vill Leit kennen dem Jay-Z säi "Black Album". Wat kënnt eraus, wann ee Schwaarz a Wäiss mëscht? Gro natierlech.
Heatwave - The Star of a Story
Heatwave war eng Funk-Disco Band, déi 1975 entstanen ass. "The Star Of A Story" ass op hirem zweeten Album "Central Heating".
