De Sample vun der Woch
Deniece Williams - Free
10 min
Der Deniece Williams hir véier-Oktaven-Sopranstëmm huet si zu engem vun de markantsten Talenter vun der Soul-Ära gemaach. Obwuel si hiren Debut am Joer 1968 gemaach huet, war et net bis an de 70er, datt d'Williams sech wierklech etabléiert huet, fir d'éischt als Deel vum Stevie Wonder sengem Wonderlove, duerno als Songwriterin, a schliisslech als erfollegräich Solo-Kënschtlerin.
"This Is Niecy", hiren Debutalbum, krut Gold a war domadder e Start fir eng dauerhaft Karriär. D'Williams ass 1951 an Indiana gebuer an ass mam Gospel-Chouer opgewuess, an deem och hir Eltere gesongen hunn. Als Teenager huet si e puer Placken opgeholl, mee ouni groussen Erfolleg. Duerch hire Cousin ass d'Williams dem Stevie Wonder hanner der Bün op engem Concert begéint. Dëst huet zu enger Auditioun geféiert an hirem Bäitrëtt zur Grupp Wonderlove, d'Hannergrond-Vokaliste vum Stevie Wonder.
D'Williams huet dräi Joer laang mam Motown-Kënschtler opgeholl, zum Beispill war si bei Sessiouns fir "Talking Book", "Fulfillingness First Finale" a "Songs in the Key of Life" dobäi, mee awer och bei Opname vumn der Syreeta a Minnie Riperton. Wärend dëser Zäit huet d'Williams bei ville Background-Vocals bäigedroen, zum Beispill beim Don Everly oder der Roberta Flack. Si huet och Material fir "Soul Train" geschriwwen, wéi zum Beispill "Baby Open the Door". 1976 huet d'Williams dann hiren éischte Solo-Album um Columbia Label erausbruecht, "This Is Niecy". Si gouf co-produzéiert vum Maurice White, dem Band Leader vun Earth, Wind and Fire. Do war och "Free" drop, dat ganz dacks am Hip-Hop gesampelt gouf.
Ee vum Bobby Bieles senge Liblingsbeispiller ass vum Rapper K-Dee vun der Lench Mob. Hie schreift der Williams hir Lyrics ëm fir "The Freshest MC In The World" doraus ze maachen. Dat war op sengem Album "Ass, Gas Or Cash (No One Rides For Free)" vun 1994.
Eng méi zäitgenëssesch Versioun vum Sample ass ze héiere bei der Rapsody an hirem "Afeni" am Joer 2019. Si mécht hei, begleet vum PJ Morton, dem 2Pac senger Mam an hirer Zäit an de Black Panthers eng Hommage, dohier passt d'Lidd "Free" natierlech ganz besonnesch gutt.
De Sample gouf awer och fir aner Genrë benotzt, wéi zum Beispill um DJ Nate sengem Lidd "Free". Hien ass e Pionéier a Saache Juke-Musek a bréngt säin Track 2010 op der EP "Da Trak Genious" eraus.
Episoden
Samuel Jonathan Johnson - My Music
Den Johnson huet mat 14 Joer ugefaangen Uergel ze spillen a gouf séier bekannt als ee vun de beschten Uergelspiller an den New Yorker Kierchen. An der Arméi entdeckt hien den Jazz.
Tom Browne - Funkin' for Jamaica (N.Y.)
De Browne war ursprünglech u klassescher Musek interesséiert, mee huet den Jazz als Student Mëtt vun de 70er op der Uni entdeckt.
A Taste of Honey - Rescue Me
A Taste of Honey war eng amerikaneschen Disco-Soul-Grupp vu Los Angeles, déi 1972 vu Janice-Marie Johnson a Perry Kibble gegrënnt gouf.
One Way - Cutie Pie
One Way war eng amerikanesch R&B a Funk Band, déi an de spéiden 1970er an Ufank den 1980er Jore populär war, dirigéiert vum Al Hudson.
Melissa Morgan - Fool's Paradise
D'Joyce Melissa Morgan, kuerz Meli'sa genannt ass eng amerikanesche R&B a Soul Sängerin a Songwriterin.
Maze - Before I Let Go
Maze, och bekannt als Maze Featuring Frankie Beverly ass eng amerikanesch Soulband, déi vum Frankie Beverly zu Philadelphia am Joer 1970 gegrënnt gouf.
The Brothers Johnson - Tomorrow
The Brothers Johnson waren eng Funk-, Disco- an R'n'B-Band, déi vun 1975 bis 1982 aktiv war.
Quincy Jones - Summer in the City
De Quincy Jones, gebuer de 14. Mäerz 1933, ass en amerikanesche Plackeproduzent, Museker, Songwriter, Komponist, Arrangeur a Film- an Televisiounsproduzent.
Ramsey Lewis - Tambura
Deen amerikaneschen Jazzkomponist, Pianist a bekannte Radio-Moderator, 1935 zu Chicago gebuer, ass leschte September am Alter vu 87 Joer gestuerwen.
DeBarge - I Like It
DeBarge war eng amerikanesch Grupp aus Michigan, déi aus verschiddene Membere vun der DeBarge Famill bestanen huet, aktiv tëschent 1979 an 1989.
Joe Cocker - Woman to Woman
Deen englesche Sänger war fir seng rau a blueseg Stëmm a seng charismatesch live Optrëtter bekannt.
The Main Ingredient - Summer Breeze
Déi amerikanesch Soul a Funk Grupp The Main Ingredient gouf 1964 am Harlem, New York City gegrënnt.
Dynasty - Adventures in the Land of Music
An den 1980er war de Label Solar Records vergläichbar mat Motown a Stax an den 1960er oder Philadelphia International an den 1970er.
Sister Sledge - He's the Greatest Dancer
Sister Sledge ass eng amerikanesch Grupp an besteet aus den Schwësteren Debbie, Joni, Kim a Kathy Sledge.
The Time - 777-9311
De Grupp The Time ass en Niewenprojet vum Prince. All d'Musek an d'Texter si vun him geschriwwen, mee gi vu The Time live op der Bün interpretéiert.
Dionne Warwick - Walk On By
En Dosende Mol gecoverte Pop-Standard
Led Zeppelin - When the Levee Breaks
Gegrënnt 1968, mat 300 Millioune verkaaften Albe ware Led Zeppelin eng vun den erfollegräichste Bands iwwerhaapt.
Art of Noise - Moments In Love
1983 huet déi englesch experimentell Grupp, bekannt fir hir Sound-Collage-Techniken an hir avantgardistesch Approche dozou, dëst Lidd erausbruecht.
The Winstons - Amen, Brother
Den Amen Break huet ganz Generatioune vu Beatmaker erzunn a gouf iwwer 5.000 Mol wärend de leschten 30 Joer gesampelt.
