One World
Amanecer
56 min
Zu Éiere vum Africa Day, deen all Joer de 25. Mee gefeiert gëtt, an deen un d'Grënnung vun der Organisation of African Unity (OAU) erënnert, huet de Label Real World Records sechs legendär afrikanesch Artisten aus sengem Katalog reeditéiert. Dorënner de Sooliman Ernest Rogers, deen an den 20er Joren op d'Welt koum ...
Dem franséisch-argentinesche Grupp Cuarteto Tafi hir Aktualitéit heescht "Amanecer", deen ë. a an der Zesummenaarbecht mat der Sängerin Leïla Martial entstanen ass. "Amanecer" ass en engagéierten Disk fir d'Mënscherechter vun Artisten, déi och beréiert si vun der Poesie, der Schéinheet am Allgemengen a vum Austausch mat aneren Artisten.
Bei The Smile héiere mir e Sound an eng Stëmm, déi mir kennen, et ass e Säite-Projet vum Thom Yorke an Johnny Greenwood vun The Radiohead zesumme mam Batteur Tom Skinner vun The Sons Of Kemet. Den Thom Yorke denoncéiert mat sengen Texter d'Hypokrisie vun der politescher Klass, déi d'Mënschen diviséiere wëllt, a mir ginn invitéiert zesummenzehalen an ze resistéieren.
D'Kate Tempest heescht elo Kae Tempest. D'Englännerin huet en neien Album "The Line Is A Curve", wou si iwwer Verletzlechkeet an Selbstentbléissung erzielt.
D'Angélique Kidjo huet no siwe Joer och en neien Album: "Mother Nature". Déi bekannten afrikanesch Artistin aus dem Benin beschäftegt sech hei mat der Natur, de Klima-Froen awer och mat aneren Theeme wéi Rassen-Ongerechtegkeet a Polizei-Gewalt. Hir Musek ass onbeschwéiert positiv bis lëschteg mat dës Kéier komplexen Inhalter.
Endlech kann och erëm de Womad Festival am Charlton Park iwwer d'Bün goen, dëst Joer vum 28.-31. Juli. Ënner villen aneren interessanten Artisten ass d'Kae Tempest derbäi, an zu den Têtes d'Affiches zielt den Nitin Sawhney. Hei fannt Dir déi ganz Programmatioun, et ass derwäert!