Et geet ëm eng syresch Famill, mat haut sechs Kanner, déi a Griichenland de Flüchtlingsstatut kritt hätt. Si wier dunn awer op Lëtzebuerg komm, well d'Liewensëmstänn a Griichenland prekär wieren an d'Behandlung vun hirem kriibskranke Kand net adequat wier. Zu Lëtzebuerg wier hir Asyl-Demande awer net ugeholl ginn, an d'Famill hätt och viru Geriicht gesot kritt, si misst a Griichenland zeréckgoen.
Staat muss sech net un d'Fuerderung halen
Fir d'Marion Dubois vun der ASBL Passerelle ass nieft de Liewensëmstänn a Griichenland och ze hannerfroen, ob de lëtzebuergesche Staat d'Kannerrechter wärend der juristescher Prozedur respektéiert huet. Ee mannerjäregt Kand vun der Famill hat nämlech gefrot fir zu senger Zäit a Syrien a Griichenland gehéiert ze ginn. Dorop hätt de Staat awer guer net reagéiert.
Un d'Opfuederung vum UNO-Kommitee fir Kannerrechter muss sech de Lëtzebuerger Staat net halen. Bei Passerelle geet een awer dervunner aus, datt Lëtzebuerg, wéi an der Vergaangenheet och schonn, d'Rechter vun de Flüchtlinge respektéiere wäert.