Temu riskéiert eng Geldstrof wéinst Verstouss géint d'EU-Digitalrecht
Déi chineesesch Online-Plattform Temu géif géint d'EU-Digitalrecht verstoussen, esou d'EU-Kommissioun. Et wier nogewisen, datt fir Konsumenten an der EU een héije Risiko géif bestoen, fir op Temu op illegal Produiten ze stoussen, heescht et no enger virleefeger Aschätzung vu Bréissel.
Dat wier virun allem bei Bëbee-Spillsaachen a klengen elektroneschen Apparater de Fall, heescht et. Déi géifen d‘EU-Normen net respektéieren. Sollt de Verdacht sech confirméieren, riskéiert Temu eng Geldstrof vu bis zu 6 Prozent vu sengem weltwäite Gesamtëmsaz.
Iwwer 45 Millioune Leit an der EU sollen all Mount Temu aktiv notzen, esou d‘Online-Plattform.
