An deem Telefonat wier hie vum amerikanesche President iwwer d‘Haaptpunkte vu sengem Treffe mam russesche President informéiert ginn, esou de Wolodymyr Selenskyj. Weider Detailer goufen et net.
Den Donald Trump huet um Samschdegmoien och europäesch Staats- a Regierungscheffen iwwer säin Treffe mam Wladimir Putin informéiert.
Donald Trump: Ball leit beim Selenskyj
Et goufe keng konkreet Resultater op deem Sommet an och keen Accord fir e Waffestëllstand annoncéiert. Den Donald Trump huet awer insistéiert: Et wiere Fortschrëtter gemaach ginn, et wier een sech iwwer villes eens ginn, mee iwwer e puer wichtege Punkten nach net.
De Ball géif elo beim Wolodymyr Selenskyj leien. Een Accord géif vum ukrainesche President ofhänken, esou nach den Donald Trump.
Lëtzebuerger Ausseminister Xavier Bettel äussert sech zum Alaska-Sommet
De Lëtzebuerger Ausseminister Xavier Bettel seet an enger éischter Reaktioun op eis Nofro hin: De Sommet wier wuel net als groussen Erfolleg ze bewäerten, mee et géif och positiv Elementer ginn.
"Dat, wat positiv ass, datt Gespréicher stattfonnt hunn, an ech mengen all Usaz, fir de Krich an der Ukrain um Enn ze bréngen, ass wëllkomm. Dat, wat mir bis elo wëssen, ass emol keen Deal gemaach ginn, ouni d'Ukrain. Dat konnt ee fäerten. Ech mengen, d'Ukrainer musse jo um Dësch sëtzen, wann iwwer Fridde verhandelt gëtt, virun allem iwwer hiren Territoire."
Déi éischt Prioritéit bleift e Waffestëllstand, déi zu Friddensverhandlungen och géif féieren, esou nach de Xavier Bettel.
