Israel misst den Zougang komplett opmaache fir op de Risk vun enger Hongersnout ze reagéieren. Der UNICEF no ginn all Mount 62.000 Tonne Waasser, Iessen a Medikamenter benéidegt.
Och de franséischen Ausseminister Jean-Noël Barrot sot Franceinfo géigeniwwer, Israel misst elo méi Hëllef iwwer Land, Mier a Loft zouloossen. Am selwechten Interview huet de Chefdiplomat awer och annoncéiert, datt Frankräich bis op Weideres keng Persounen aus Gaza méi géing ophuelen. Dat nodeems bekannt gouf, datt eng palestinensesch Studentin, déi a Frankräich Schutz fonnt huet, antisemittesch Contenuen op de soziale Plattforme gepost huet. Dofir wëllt de Barrot elo d’Konsequenz zéien. Déi jonk Studentin muss Frankräich verloossen. All aner Persounen aus der Gazasträif, déi a Frankräich opgeholl goufen, sollen elo genee kontrolléiert ginn, fir sécherzestellen, datt si keng antisemittesch Positioune vertrieden.
