Mam sougenannte Pedibus kënne Kanner op verschiddenen Arrêten ofgeholl ginn a mat erwuessene Begleetpersounen zesummen zu Fouss an d’Schoul trëppelen.
Éischt nei Linn um Belair
Déi éischt nei Linn wäert schonn de 5. Januar agefouert ginn, wéi de Maurice Bauer erkläert.
"Dat ass eng Linn um Belair, fir an d'Schoul Aloyse Kaiser ze goen. Déi wäert eng Distanz hu vun 952 Meter a mat véier Arrêten, wou dann eeben och d'Kanner kënnen do de Moment waarden an dann an d'Schoul begleet ginn."
An all de Quartiere géing et eng grouss Demande ginn, erkläert de Maurice Bauer. Dofir ass decidéiert ginn, no Fuesent weider Linnen opzemaachen.
Deemno wäerte véier nei Linnen um Lampertsbierg bäikommen, véier zu Bouneweg an eng zu Eech.
De Pedibus wier eng gutt Méiglechkeet, fir datt Kanner sécher géifen an d’Schoul kommen, dat op eng ëmweltschounend Aart a Weis, wou een aner Kanner kéint kenneléieren, an a Beweegung wier, esou nach de Stater Schäffe Maurice Bauer.
