Den DP-Fraktiounschef betount, d’Zesummenaarbecht mat der CSV géif gutt funktionéieren. Datt de Premier Luc Frieden d’lescht Woch eng Ausso iwwer d’Atomenergie gemaach hat, déi esou net am Koalitiounsaccord steet, géif näischt dorun änneren.
DP: Et muss sech un de Koalitiounsaccord gehale ginn
De Premier sot, datt dës Regierung eng méi “technologieoppen” Approche hätt, wann et ëm d’Atomenergie geet. De Gilles Baum weist drop hinn, datt de Premier d'Ausso, déi hien zu Bréissel gemaach hat, relativéiert hätt. Den DP-Politiker seet och, datt aus dem Koalitiounsaccord kloer géing ervirgoen, datt Lëtzebuerg sech vun der Atomenergie wéilt distanzéieren, an dat géif och weiderhi gëllen.
“Et ass eng Ausso, déi effektiv net am Koalitiounsaccord steet, a mir halen eis un dat, wat am Koalitiounsaccord steet. Wann do aner Aussoe vun engem Regierungsmember kommen, da froe mir no. Da wéisste mir dat gär. An den Här Frieden ass jo och an d’Chamber komm fir sech ze explizéieren.”
De Profil vun der Partei schäerfen
Zwou DP-Deputéiert haten de Premier no senger ëmstriddener Ausso gefrot fir méi Erklärungen dozou ze ginn, wéi d’Regierung zur Atomenergie steet. Domat wiere si total an hirer Roll, seet de Gilles Baum. Esou Froe géifen dozou bäidroen, de Profil vun der Partei ze schäerfen.
“Et däerf een net hannert engem Koalitiounspartner verschwannen. Dat war an der leschter Koalitioun och ni de Fall. Ech hu fonnt, datt déi gréng, d’Sozialisten an d’DP do ëmmer hir eege Profiller an Iddien haten. An dat soll a wäert an dëser Koalitioun och esou bleiwen.”