Dräi Statute fir zum Deel déi selwecht Aarbecht ze maachen, awer zu ënnerschiddleche Konditiounen, wier net glécklech, sou den FGFC-President Claude Reuter.
Vun de 16.000 Leit, déi am Gemengesecteur schaffen, sinn der 5.000 fonctionariséiert. Déi aner 11.000 – Aarbechter virun allem, awer och ëmmer méi Leit an der Verwaltung, falen ënnert de Statut vum Salarié. Bäi déi Ënnerscheeder an den eenzele Gemenge kéimen dann nach Ënnerscheeder uechter d’Land derbäi, well et keen eenheetleche Kollektivvertrag fir 11.000 Gemengen-Aarbechter an – Employéen am Salariatsstatut gëtt.
Oppe fir Diskussioune mat de grousse Gewerkschaften
Fir seng Organisatioun, déi déi dräi Kategorië vu Gemengepersonal vertrëtt, wier dat och keen einfache Spagat.
„Mir sinn ee Secteur, mir sinn een ëffentlechen Déngscht, deen eng Déngschtleeschtung ofzeruffen huet. An déi schaffen nun emol zesummen. Dofir ass eis Vocatioun, eis Identitéit de Gemengesecteur. An do gehéiert nun eemol de Fonctionnaire, den Employé an de Salarié zu enger Unitéit.“
Fir d‘FGFC géif just ee kommunalen, sektorielle Kollektivvertrag Sënn maachen „fir dee ganze System, wéi mer fonctionnéieren, och bei de Salariéen oprecht ze erhalen“. Hie rechent och domat, datt déi grouss Gewerkschaften no de Sozialwalen oppe fir esou Diskussioune wäerte sinn.
