Den Alinea 6 vum Artikel 563, an deem et ëm déi einfach Heescherei gaangen ass, soll endgülteg aus dem code penal erausgeholl ginn. Virgesinn ass, datt déi einfach an déi organiséiert Heescherei duerch déi aggressiv Heescherei ersat ginn. Déi gréng Deputéiert a fréierer Justizministesch Sam Tanson ass mat dëser Formuléierung net zefridden.
"Et kënnt lo den Term “Aggressiv” an de code penal, en Term deen awer ganz vage ass, wou mir awer schonn aner Termen hunn, wéi Violence oder insultes, déi schonn am code pénal stinn, déi och vill méi kloer sinn.”
Vill Spillraum fir Interpretatioun
Zwar gouf sech hei um franséischen Text inspiréiert, an et goufen eng Rei Beispiller genannt, fir ze definéieren, wat alles ënner aggressiv Heescherei fält, mee der Oppositioun feelt et trotzdeem nach u Kloerheet. Den LSAP-Deputéierten Dan Biancalana betount, datt et beim Begrëff vun der Aggressivitéit vill Interpretatiounsspillraum gëtt. Och dem Deputéierte vun déi Lénk Marc Baum ass déi Notioun ze vage.
“Dat bleift dann herno awer eng subjektiv Wahrnehmung, soit vun deene Beamten, déi dat mussen ophuelen, soit vun deene Leit, déi dat denoncéieren.”
Inneminister annoncéiert Gesetzesprojet fir Gemengereglementer
Um Heescheverbuet an der Stad ännert dësen Avant-projet-de-loi awer näischt. Wéi d’Justizministesch Elisabeth Margue erkläert, ass de code pénal nämlech net d’base légale vum Stater Gemengereglement.
"Dat Stater Gemengereglement ass op Dekreeter baséiert aus dem Enn vum 18. Joerhonnert, wou lo ee Geriicht sech muss domat befaassen, ob dat lo konform ass mat eiser Constitutioun an eise Grondrechter.”
Den Inneminister Léon Gloden huet ee Gesetzprojet annoncéiert, dee sech mat de Gemengereglementer befaasse soll, sou nach d’Prezisioun vun der Justizministesch Elisabeth Margue.