De Stater Gemengerot huet dofir de Méindeg eng weider Finanzsprëtz fir de Carloh-System decidéiert. D'Stad erhéicht d'Kapital vun der Gesellschaft hannert dem Autolocatiounsystem ëm 1,8 Milliounen Euro.
Dem Stater Schäfferot wier vun Ufank u kloer gewiescht, datt de System net gewënnbréngend kéint schaffen. Dofir hätt een och vun 2015 un eng järlech Kapitalsprëtz vu bis zu 600.000 Euro virgesinn, seet de Stater Transportschäffe Patrick Goldschmidt.
Ziler aus dem Businessplang net erreecht
De Businessplang hat ursprénglech virgesinn, datt een no 10 Joer 1.800 Abonnenten hätt an domat de break even erreeche géif, de Service huet der haut awer just ronn 1.100. De Patrick Goldschmidt mécht ënner anerem d'Pandemie an d'Präisdeierecht am Kader vum Ukrainkrich dofir responsabel.
Et géif een elo intern Analyse maachen a Verbesserungen decidéieren. Donieft hätt ee Kontakt mat den CFL opgeholl, déi de Locatiounsservice Flex bedreiwen, mat deem een eventuell fusionéiere kéint. Flex hätt iwwerdeems 5 mol méi Gefierer wéi de Carloh-System, 15 mol méi Abonnenten a géif awer Perte maachen, sou de Stater Mobilitéitsschäffen.
Service soll weider erhale bleiwen
Et wier iwwerdeems keng Optioun fir de Carloh-System ersatzlos ze sträichen, sou de Patrick Goldschmidt. De Service wier eng wichteg komplementar Mobilitéitsoffer an de Service géif am Fall vun enger eventueller Fusioun och net verschlechtert ginn. Och d'Carloh-Personal misst sech dofir keng Suergen ëm hir Aarbechtsplaz maachen, sou de Stater Mobilitéitsschäffen.
De Patrick Goldschmidt am Gespréich mam Maurice Molitor