Sauer opstousse mécht dem Christian Wester ënner anerem de rezente Vott iwwert d’Naturwiederhierstellungsgesetz op europäeschem Niveau. „Dat war elo nach net geplangt“, esou de Christian Wester. Si wieren dovunner ausgaangen, datt deen Dossier eréischt mat der neier EU-Kommissioun aktuell géif ginn. De Lëtzebuerger Ëmweltminister Serge Wilmes wier do e bësse virgeprescht, seet de Christian Wester.
“Et ass mühseeleg”
Och um Punkt vum Bauen an der Gréngzone hat ee sech mei Pragmatismus erwaart. D’Fortschrëtter, déi gemaach ginn, ginn nëmme lues, konstatéiert de Christian Wester: "Et ass mühseeleg.“
Hie weist mam Fanger op verschidde Beamten am Ëmweltministère. Dat wieren deels déi selwecht, wéi ënnert der leschter Ministesch. Si sollten elo emol iwwert hire Schied sprangen, fuerdert de President vun der Bauerenzentral. De Minister Wilmes misst do eng nei Marschroute einfach duerchsetzen.
"Den ökologesche Volet huet bei eis ëmmer nach en héije Stellewäert, d’Landwirtschaft ass do ënnergeuerdent“, seet de Christian Wester. Hie mengt och net, datt déi aktuell Landwirtschaftsministesch Martine Hansen staark ënner Zwang ass, mat de Reegelen, déi vun der EU festgesat ginn.
"Déi Reegele kann een e bëssen hin an hier zeien", seet de Christian Wester. Do bräicht et einfach e bësse Pragmatismus.