Nom legendäre Klarinettist, Swing-Legend a Bandleader Hugo Strasser geet et dës Kéier ëm eng weider Swing- an Big-Band-Legend an Däitschland, e Museker, deen den 2. Abrëll 1926 gebuer gouf, virun 100 Joer deemno: de Saxofonist a Klarinettist Max Greger.
De Max Greger war am Fong Synonym vum däitsche Swing. Wann hien de Saxofon tëschent Lëpse geholl huet, dann huet net nëmme säin Orchester geswingt, mee ganz Däitschland huet vibréiert. Dem Max Greger seng Musek ass och ganz enk mat der Zäit vun de groussen Televisiounsshowen op der däitscher Tëlee verbonnen, de säi Sound aus de Wirtschaftswonnerjore bei eisen däitschen Noperen.
Et gouf eng Zäit, do konnt een esou guer Max Greger héich dräi erliewen, wéi de legendäre Museker zesumme mat sengem Fils Max Greger Junior a sengem Enkel Max Greger Junior opgetrueden ass, dräi Generatioune Greger stoungen op enger an där selwechter Bün.
De Max Greger huet iwwer 150 Placken opgeholl, déi all säi Klang haten, virun allem mat deem kräftege Saxofon-Sound. Hie gehéiert op där enger Säit mam Paul Kuhn an Hugo Strasser zu den dräi däitsche Swinglegenden, an op där anerer Säit mam James Last an dem Bert Käempfert awer och zu de Spezialiste vun der däitscher Easy-Listening-Musek.