De Robert Redford war ganz laang ee vun de schéinen Hollywood-Staren an awer gläichzäiteg och e Rebell, well seng grouss Passioun war den Independant-Film an d’Natur.
De Robert Redford huet mat Filmer wéi “Butch Cassidy and the Sundance Kid”, “The Sting”, “The Old Man and the Gun”, “The Horse Whisperer” oder “Out of Africa” Filmgeschicht geschriwwen, als Acteur mat vill Charme, Nodenklechkeet a ganz vill Eleganz. De Robert Redford war awer méi wéi just Acteur, hie war Regisseur, Produzent, Ëmweltaktivist a Fondateur vum ganz bekannte Sundance-Filmfestival. An domadder huet hien de Kino an d’Gesellschaft inspiréiert.
Lescht Woch, en Dënschdeg, 16. September, ass de Robert Redford am Alter vun 89 Joer zu Sundance am Utha gestuerwen, an ass och do, ganz roueg, just am Krees vu senger Famill, ouni Mediepresenz, begruewe ginn.
Vum Robert Redford bleift en impressionant Wierk, voller Biller a Geschichten, e Kënschtler mat Réckkräiz, deem seng Passioun de Kino war, deen awer de Bléck op d’Welt nieft dem Kino net vergiess huet.
De Jean Claude Majerus erënnert un dee charismateschen Acteur mat de bloen Aen a klore Meenungen.