Et war den 29. September 2010, wéi eng Hollywood-Legend definitiv Äddi gesot huet. D‘Dramfabrick war am Trauer: den amerikaneschen Acteur Tony Curtis war am Schlof gestuerwen.
Et war besonnesch d’Verféierungszeen mat der Marilyn Monroe an dem Cineast Billy Wilder sengem Filmklassiker “Some Like it Hot”, déi den amerikaneschen Acteur Tony Curtis berüümt gemaach huet.
E Film, deen ëmmer dem Tony Curtis säi gréisste Succès blouf, e Film awer och, dee berufflech säi schauspillerescht Talent just op hien als Schwarm vun de Frae minimiséiert huet, an dobäi huet den Acteur awer a ronn 100 Filmer matgespillt, an deenen hie säin aussergewéinleche Spektrum als Acteur gewisen huet. Um groussen Ecran konnt een de Curtis als Fraemärder oder Transvestit, als Prisonéier oder Pirat, als Zirkusartist oder klenge Brigang gesinn, en Oscar fir eng vu senge Rolle krut hien awer ni.
Den Tony Curtis koum den 3. Juni 1925 zu New York als Bernard Schwartz op d’Welt, deemno gëtt dës Woch un dem Acteur säin 100. Anniversaire geduecht.