De Fernand Fox ass dout. En Dënschdeg koum d’Nouvelle, datt dee beléifte Lëtzebuerger Sänger an Acteur am Alter vun 90 Joer gestuerwen ass.
Den Theater, de Film, de Variété, also am Fong den Divertissement zu Lëtzebuerg huet elo mam Foxe Fern ee vu senge ganz Grousse verluer. Den Acteur a Sänger huet mat senge Lidder, Sketcher a sengem komeschen Talent, et kann ee roueg soen, Generatioune vu Leit vill Freed gemaach, mee hie wosst dernieft awer och a méi eeschte Rollen ze iwwerzeegen.
De Fernand Fox hat vill verschidde Facetten, et erënnert ee sech sécher u seng Assurance-Reklammen zesumme mam Marc Olinger, seng Rollen an den Andy Bausch-Filmer, oder wann ee méi wäit zeréckgeet, u seng Optrëtter am Kasemattentheater zesumme mam Tun Deutsch.
De 26. Januar dëst Joer huet de Fernand Fox nach säin 90. Anniversaire konnte feieren, an elo ass hien dës Woch gestuerwen.
Et war scho méi roueg gi ronderëm hien an de leschte Joren, mee fir ëmmer huet een d’Bild vun him virun Aen, wéi hien do steet, natierlech mat der Zigarett am Grapp, an op seng Manéier ze schmunzen.