An de leschte Joren ass de Joresnidderschlag zeréckgaangen. Gläichzäiteg ass d’Joresduerchschnëttstemperatur eropgaangen, wat dann erëm Auswierkungen op d’Waasserverdonstung mat sech bréngt. Dëst bedeit ee grousse Stress fir eis Beem. Wann dëse Stress iwwer Joren unhält, da stierwen d’Beem of. Zousätzlech gesäit een déi negativ Auswierkungen op Beem, déi ursprünglech aus anere Klimazone komme wéi z. B. d’Dänn. D’Dänn staamt aus den alpine Regiounen, wou hiren natierlechen Optimum eebe bei méi engem héije Joresnidderschlag respektiv méi nidderege Joresduerchschnëttstemperature läit. Dës optimal Conditioune fënnt d’Dänn awer aktuell hei net méi. Si ass geschwächt an als Konsequenz vum Klimawandel kënnt dann nach de Borkenkäferbefall derbäi.
Fir deem entgéingt ze wierke bedreift d’Naturverwaltung en adaptive Bësch-Management, also eng naturno integrativ Virgoensweis, bei där natierlech Prozesser genotzt ginn an de Bësch méi sech selwer iwwerlooss gëtt. Doriwwer eraus gëtt d’Diversitéit vun de Bamarte gefërdert an op de Standuert ugepasst, woubäi den Akzent op Lafbeem gesat gëtt.
Doutholz späichert wärend der Zersetzungsphas ganz vill Waasser, wat duerno ganz lues un den Bëschbuedem ofgi gëtt. Et suergt och fir méi Biodiversitéit an eise Bëscher, well ganz vill Aarten op dës Zerfallsprozesser ugewise sinn ( z. B. Spiecht, Pilzen, Käferen asw.) Als Insektefrësser an Hölebauer fillt de Spiecht sech an engem naturnoe Bësch ganz besonnesch wuel.
Explikatioune vum Steve Jungen, Responsabel vun der Cellule sensibilisation et CNF - Service communication et sensibilisation vun der Administration de la nature et des forêts.
Erausgepickt:
Den Naturschutzzentrum Burfelt bitt d’ganz Joer iwwer vill interessant Aktivitéiten ëm d’Theeme Bësch, Wëllbeien, Wëllkraider, Louschläissen a vill aneres un an invitéiert de 27. Mee op eng Féierung zum Theema “Wald im Wandel - Opfer & Hoffnungsträger zugleich“. Umelle kann ee sech bis spéitstens den 20. Mee op: burfelt@anf.etat.lu
An der Woch vum 20. Januar kënnt och deen nei Joresprogramm mat den Aktivitéite vun de 5 Naturschutzzenteren eraus. (www.nature.lu)
Hei fannt Dir och en interessante Programm à la carte fir Schoulklassen souwéi spannend Léierpied am ganze Land.
