One World
Soul
60 min
Zu London gebuer vu jamaikaneschen Elteren a laang Joren an Australien gelieft: d'Shirley Davis ass haut d'Lead Vokalistin bei de Silverbacks.
Dem brittesche Kollektiv Sault seng Besetzung ass weiderhin onbekannt. Hir Musek verbënnt verschidde Stiler, dorënner zäitgenësseschen R&B, House an Disco.
Als DE Phenomeen aus Neuseeland ginn L.A.B beschriwwen, a fënnef Joer hu si fënnef Disken erausbruecht, eng Decouverte à suivre ...
De J. P. Bimeni ass en 41 Joer jonken Newcomer, dee mat senger Soul weess, vu wat hie sengt, well hien am Biergerkrich am Burundi méi wéi eemol knapps mam Liewen dervukoum.
Coup de coeur-Decouverte: Dräi Joer laang war den Zürecher Fai Baba an engem indesche Klouschter. Zeréckkoum hien als rouege Mënsch an als virwëlzege Museker. Op sengem neien Album sengt hie fir d'éischt a senger Mammesprooch, op Schwyzerdütsch.
De Produzent Schvédranne vu Lyon huet mat den Texter vum mythesche Poet Jack Hirschman vu San Francisco de Konzept Album "Vanity Vanity All Is Vanity" agespillt. Den Jack Hirschman war en amerikanesche Poet a sozialen Aktivist.
"Rejoice" ass de gemeinsamen Album vum nigerianeschen Drummer Tony Allen zesumme mam südafrikaneschen Trompettist Hugh Masekela, iwwerschriwwen. Dës zwee weltbekannt Artiste sinn entretemps verstuerwen, "Rejoice" koum via World Circuit am Mäerz 2020 op de Maart, an déi original Sessions stamen aus dem Joer 2010, wou déi zwou Legende sech zu London iwwer de Wee gelaf sinn.
Och aus Süd-Afrika, grad wéi den Hugh Masekela, kommen BCUC, ee bis zu siwekäppege Kollektiv vu Soweto, deem seng Musek dacks als "afro-psychedelic future Pop" beschriwwe gëtt ...
Am kreative Prozess fräi a senge Choixen ze sinn, dat ass dem Oan Kim wichteg. De franséisch-koreaneschen Artist dréckt sech mol mat senger dokumentarescher Fotografie aus an evoluéiert parallel zu dëser och als Museker, Auteur a Komponist. (Coup de Coeur!)
De brittesche Fusiounstrio vu Manchester GoGo Penguin gëtt als d'Radiohead vum Jazz bezeechent. Zweemol ware si am Atelier programméiert, Concerten, déi ëmmer erëm verluecht goufen an elo fir den 19. Oktober dëst Joer ugekënnegt ginn.