Déi Neo-Psychedelesch-Beat-Band aus Südfrankräich, The Limiñanas huet mam Titel "Calentita" de perfekten Tube fir waarm SummerDeeg agespillt, gewierzt mat engem spezielle Kraut ...
Bekannte Melodien aus dem Jazz gi vum spuenesche Museker Roé op senger Anthologie "Jazz Rumba Club" revisitéiert.
Ëm den "Exotic Mood Modifier" Marihuana, deen elo bei eis fir de perséinleche Gebrauch legaliséiert gouf, geet et och beim Lalo Guerrero sengem Boogie an Éiere vum Cannabis- Kraut.
Fir d'Kanner vu bekannte Museker ass et net einfach sech ze demarkéieren an hiren eegene Stil ze fannen. De Vieux Farka Touré huet sech mat sengem eegenen Talent e Virnumm geschaaft! De Fils vum groussen Ali Farka Touré ass haut bei sengem sechste Solo Album ukomm: "Les Racinnes".
Den Yvan Robilliard ass e Pianist, dee selwer och komponéiert an dee scho mat véier Joer hanner den Tasten souz, hien ass an eng Museker-Famill eragebuer. Säin Album "Homemade" erzielt eng ënnerlech Rees, déi Mount fir Mount dem Artist seng Visioun vum Joer 2020 erzielt. Déi Zäit, an där mir all vu soziale Kontakter ofgetrennt waren, huet den Yvan Robilliard en Dialog tëschent fënnef Keyboards geféiert.
Esou lues komme mer an de Genoss vun de séisse Friichte vum Lockdown, Merci den Artisten! "Heteroklite Lockdown" gëtt dem weltbekannte Kontrabassist a Multiinstrumentalist Henri Texier säi Gemittszoustand erëm aus dem Joer 2020.
Déi psychedelesch Soul Band Monophonics vu San Francisco invitéiert hei mat hirem neien Album "Sage Motel" op d'Re-Ouverture vun dësem mythesche Motel, deen ursprénglech als Erhuelungsplaz fir Camions-Chauffeure geduecht war a wou sech spéiderhin eng Zeen vun Aussteiger a Konschtschafenden entwéckelt huet. D'Band spillt sech mat all Track vum Check In bis zum Check Out duerch déi vereenzelt Raim vum Sage Motel, observéiert an erzielt iwwer all dës Schicksaler a verluere Séilen, déi hei gelant sinn.
De Quiet Dan huet viru Kuerzem eng nei Single verëffentlecht, "One by One". De Singer-Songwriter, dee sech a Frankräich niddergelooss huet, huet en eegenen Touch.
Once Twice Melody ass den aachte Studio-Album vum amerikaneschen Dream-Pop Duo Beach House, et ass en duebelen Disk mat 18 Lidder, déi a véier Kapitele presentéiert ginn. D'Formel hei ass dem Alex Scally säi Gittarespill - dat vu vereenzelte Kritiker als flëssegt Gold bezeechent gëtt - an der Victoria Legrand hir Synthi-Kläng an duuss Stëmm, déi sech an d'Ouer annisten, wat da geschitt, kritt en Eege-Liewen ....
Playlist:
The Limiñanas - Calentita (feat. Nuria) - Calentita (feat. Nuria) - Single
Roé - It Don't Mean a Thing (Na Vale Na) - Jazz Rumba Club
Lalo Guerrero - Marihuana Boogie - Chica Patas Boogie
Vieux Farka Touré - Be Together - Les Racines
Vieux Farka Touré - Les Racines - Les Racines
Yvan Robilliard - Double jeu - Homemade
Henri Texier - Take Your Time - Heteroklite Lockdown
Monophonics & Kelly Finnigan - Sage Motel - Sage Motel
Michael Kiwanuka - Final Days - KIWANUKA
Quiet Dan - One by One - One by One - Single
Beach House - ESP - Once Twice Melody
Beach House - Over and Over - Once Twice Melody
Black Sea Dahu - Affection - I Am My Mother