One World

De franséische Multiinstrumentalist Oan Kim spillt de Piano, d'Gei, de Saxofon, d'Gittaren an d'Klavéieren. Hien ass vu ville Stiler beaflosst a säin Album "Oan Kim & the Dirty Jazz" ass e Regal!

De Saxofonist Laurent Bardainne huet mat "Hymne au soleil" säin neien Album zesumme mam Quartett Tigre d'Eau Douce agespillt. De Breton ass en Touche à tout, hei héiere mir Bléiser an engem coole Groove agepaakt. Mat sengem "Tiger" evoluéiert de Klang mat Liichtegkeet tëschent de Genren: vun der Soul aus de 70er bis zum Ethio-Jazz en passant iwwer den Jazz vum Coltrane.

Ethio-Jazz héiere mir och beim Kollektiv Arat Kilo. Hire Projet "Sowal Diabi" sëtzt sech mat der Migratioun ausenaner, e Projet, deen am Austausch mat aneren Artisten zustane koum, dorënner Siar Hashimi (Afghanistan), Aïda Nosrat & Sogol Mirzaei (Iran), Rușan Filiztek (Tirkei | Kurdistan) a Mamani Keita (Mali).

Jasdeep Singh Degun, de klassesch trainéierte Sitar-Spiller a Komponist, erneiert de Raga, säin Debut-Album. "Anomaly" kënnt via Real World Records eraus, zwee Extraite sinn elo schonn disponibel.

Lokum oder Turkish Delight, dat ass jo e gudde pechegen ultraséissen Dessert, mee et ass och eng Formatioun, déi an den Enn 70er vum Orhan Seyfi Çelik gegrënnt gouf. De Multi-Instrumentalist experimentéiert mam Klang vun orientaleschen Instrumenter. Hie gëtt ugesinn als ee vun deenen éischten, déi de Genre Industrial World Music an d'Liewe geruff hunn.

D'Konscht sech selwer ze sinn am Austausch mat aneren, dat bedeit "Djourou", den Album vum Ballaké Sissoko aus dem Mali. "Djourou" ass dëse Lien, deen de Ballaké Sissoko mat anere connectéiert, esou den Artist selwer.

Eng weider Decouverte vun dëser Woch ass den amerikanesche Folk Museker Jake Xerxes Fussell. Hie kënnt aus de Süd-Staaten an ass mam Blues a mat der Country grouss ginn. Haut mat 40 Joer ass den Jake Xerxes Fussell bei sengem véierten Album ukomm, en Disk, deen exzellent Kriticke kritt, ganz einfach well e beréiert mat der Aart a Weis, wéi en déi traditionell Elementer aus dem Folk mat enger moderner Haltung kombinéiert.

Playlist:


Oan Kim - Agony - Oan Kim & the Dirty Jazz
Oan Kim - Whispers - Oan Kim & the Dirty Jazz
Laurent Bardainne & Tigre d'Eau Douce - Sarang - Hymne au soleil
Laurent Bardainne, Celia Wa & Tigre d'Eau Douce - Jou en nou rivé - Hymne au soleil
Joseph Malik - Strange New Places (feat. Lynzie Dray) - Diverse, Pt. 3
Lisa Cat-Berro - Les fleurs de Sakura - Good Days Bad Days
Arat Kilo, Mamani Keita, Rusan Filiztek & Siar Hashimi - Snow in Addis - Sowal Diabi (From Kaboul to Bamako)
Jasdeep Singh Degun - Veer - Anomaly
Turkish Delight - Velvele - Prophecy
Ballaké Sissoko - Djourou (feat. Sona Jobarteh) - Djourou
Jake Xerxes Fussell - Carriebelle - Good and Green Again
Alison Krauss & Robert Plant - Trouble with My Lover - Raise The Roof (Deluxe Edition)
Marisa Anderson & William Tyler Lost Futures - Haunted By Water

Episoden