De "Special Purpose Vehicle", kuerz SPV, wier keng legislativ Moossnam, mee eng Initiativ vun de Lëtzebuerger Banken an der ABBL, betount de Finanzminister Gilles Roth. Esou géif net just vu Säite vun der Regierung, mee och vun de Banken een Effort gemaach ginn.
1.300 Wunnenge bis Enn dës Joers opkafen
Konkret besteet de sougenannten SPV aus den Aktionäre Spuerkeess, BIL, Raiffeisen an SNCI, woubäi d’Spuerkeess mat 48 Prozent den Haaptaktionär ass. Mat enger Enveloppe vun am Ganzen 250 Milliounen Euro soll dës Gesellschaft nach dëst Joer bis zu 1.300 Wunnengen, déi den Ament nach en Attente sinn, opkafen an erëm op de Marché brénge kënnen.
Op déi Manéier géifen Immobilien, bei deenen d’Promoteuren nach Schwieregkeeten hu si ze verkafen, méi séier weidergeféiert a vermaart ginn. Esou soll d’Offer séier erweidert ginn.
En temporär Mesure
Et wier eng temporär a kuerzfristeg Mesure, fir d’Logementssituatioun ze deblockéieren, betount d’Generaldirektesch vun der Spuerkeess Françoise Thoma. Den SPV wier och keen neien Acteur um Maart, dee Konkurrenz mécht. Esoubal den SPV säin Zil erreecht hätt, géif een de Projet erëm zeréckzéien.
An enger éischter Phas soll elo de Marché sondéiert a mat Promoteure Kontakt opgeholl ginn, déi am Besëtz vun entspriechende Projete sinn.
Net egal wéi ee Präis an egal wéi eng Gréisst
Hei géif et awer eng Rei Reegele ginn, erkläert nach d’Françoise Thoma. Si géifen net egal wéi ee Präis bezuelen, mee deen, deen de verschiddene Regiounen entsprécht. Och géife just Immobilie mat enger raisonnabeler Gréisst opkaaft ginn. Dat wäert vun engem professionelle Comité d’investissement geréiert ginn.
Nieft de Grënner-Banke vum SPV wieren och weider Banken invitéiert fir sech un dësem Projet ze bedeelegen, huet et nach vun der Spuerkeess, BIL, Raiffeisen an SNCI geheescht.