Dëst ass eng éischt Etapp a Richtung Trounwiessel an ee fléissenden Iwwergang vun engem Staatschef op deen aneren.
An der Vergaangenheet gouf et scho 5 Lieutenancen, mam Ierfgroussherzog Guillaume wier et déi 6. Kéier.
D’Lieutenance bedeit, dass den Ierfgroussherzog Guillaume lues a lues u seng zukënfteg Roll als Staatschef erugeféiert gëtt. Hien kann ëmmer méi Aufgaben am Numm vu sengem Papp iwwerhuelen.
De Grand-Duc kann dem Lieutenant Représentant eng Partie Pouvoiren delegéieren. Do virdru muss den Ierfgroussherzog virun der Chamber een Eed ofleeën.
De Grand-Duc Henri war och op seng Responsabilitéiten als Groussherzog virbereet ginn. De 4. Mäerz 1998 hat säi Papp, de Grand-Duc Jean, den deemolege Prënz Henri zu sengem Lieutenant-Représentant gemaach. Zwee an en halleft Joer drop, am Oktober 2000, ass hien du Staatschef ginn.