Am Laf vum leschte Schouljoer ass d‘Zuel vun de Jonken, déi d‘Schoul ofgebrach hunn, erëm geklommen. Nodeems deen Taux d‘Schouljoer virdrun, also 2022/23 ëm een hallwe Punkt zréckgaange war, ass en d‘lescht Schouljoer rëm an d‘Luucht gaangen, op elo 8,2%. Dat ass de selwechten Niveau, wéi wärend den zwee Pandemiejoren, 2020 bis 2022. Deemno hunn d‘lescht Schouljoer 1.884 Schüler mat der Schoul opgehalen.
Déi Zuelen huet den Educatiounsministère um Donneschdeg matgedeelt. Lëtzebuerg läit domat ënner der Moyenne aus den Eurolänner, wou den Taux vum Decrochage scolaire bei 9,6% läit.
Déi meescht Jonker, déi d‘Schoul ofbriechen si Jongen, an déi meescht halen op 4e oder 3e op, also tëschent 15 a 17 Joer. Bal een Drëttel hunn dee Moment schonn e schoulesche Retard vun zwee Joer.
