Den Informatiouns- a Mediatiounsservice mat Sëtz zu Gaasperech bitt ënnert anerem eng Telefonslinne, iwwer déi ee sech och berode ka loossen, wann een op der Sich no engem Altersheem, enger Dagesaktivitéit oder engem ambulante Fleegeservice fir eng eeler Persoun ass.
Zanter Ugangs des Joers krut de SIMPA siwen Dossiere vu Reklamatiounen eran. Ee Fall wou een déi verschidde Parteien hätt misste fir eng Mediatioun un een Dësch bréngen, gouf et awer nach net, sou d’Mediatrice virun der Press. Si an hir Ekipp schaffen enk mam Gesondheets-Mediateur zesummen.
De Service SIMPA ass Deel vum neie Qualitéitsgesetz iwwer d’Servicer fir eeler Mënschen, dat dem DP-Minister Max Hahn no soll dozou bäidroen, datt Seniore bis an den héijen Alter um gesellschaftleche Liewe kënnen Deel huelen.
