Esou Aussoe wieren absolut inacceptabel, seet de Mathis Godefroid am 100,7 Interview. Dat wiere Frechheeten an Diffamatiounen. Hie géif sech d‘Recht behalen, juristesch Schrëtter ze goen, an hie géif sech erwaarden, datt den Inneminister intervenéiert.
"Dat dote weist ganz kloer och en Non-Respect eis géigeniwwer, der ganzer Oppositioun, do sinn Insulten an Diffamatiounen dobäi."
Hannergrond ass de Sträit zu Hesper tëschent Oppositioun a Schäfferot an der Affär ëm e fréiere Gemengebeamten. Dee krut virgehäit, seng Schaffzäite manipuléiert ze hunn a gouf no enger disziplinarescher Prozedur an d‘Preretraite geschéckt. D‘Oppositioun gehäit dem Schäfferot am deem Kontext ënner anerem Intransparenz fir.
An der Gemengerotssëtzung vum 14. Mäerz soll am Gemengerot viraussiichtlech driwwer ofgestëmmt ginn, ob d’Gemeng sech viru Geriicht och als Partie civile an där Affär constituéiert.
