Virun allem mat Bléck op de Risiko vun der Spionage wier et ganz wichteg, sech der Weiderbildung net ze verschléissen, betount den André Wilmes.
"Wat si Sécherheetsklassifikatiounen? Wat sinn och d'Risikoen, wann ech reesen? Et ginn och Casen an de leschten zwee Joer vun offiziellen europäesche Genereel, déi sech hacke gelooss hunn um Wifi am Hotel."
Et misst een also och déi néideg Reflexer sech ugewinnen. Dat ass dann och d'Roll vun der ASBL LuxDefence "am Tram schwätzen iwwert dëst oder jenes, déi Zäite sinn eriwwer.“, betount den André Wilmes.
Net de But nei Entreprisen op Lëtzebuerg ze bréngen
Am 100,7 Interview erkläert hien och, datt d'ASBL Uspriechpartner fir d'Regierung ass. Allerdéngs hu si net zum Zil, nei Entreprisen op Lëtzebuerg ze bréngen, esou den André Wilmes. Dofir géif et aner Acteuren zu Lëtzebuerg ginn, ënner anerem Luxinnovation, déi éischter an deem Beräich schaffen. Deemno wäert d'ASBL och net de Pavillon op der Airshow um Bourget zu Paräis iwwerhuelen.
"Mir kënne kucken aner Firmen, Delegatiounen op dee Pavillon ze bréngen, datt do Flux entsteet, datt d'Leit sech do rencontréieren, datt do en Echange stattfënnt."
Et géif een also éischter am Hannergrond hëllefen, esou den André Wilmes.
