De Staat huet der Caritas ee Kredit vu 5 Milliounen Euro accordéiert. Dem CSV-Finanzminister no géif d’Caritas elo nach eng leschte Kéier definitiv driwwer befannen, ier d’Suen dann och effektiv iwwerwise wäerte ginn.
Wann d’Ënnerschrëften all gesammelt sinn, da wäerten d’Suen och zäitno iwwerwise ginn, esou de Gilles Roth. Hien huet am 100,7-Interview och preziséiert, wat déi 5 Milliounen Euro genau sinn.
“Dat ass engersäits déi Prestatioun, déi d'Caritas fir de Staat geleescht huet, wou nach déi lescht Dekonten net gemaach sinn, fir déi en Avance kënnen ze bezuelen. Da sinn et och d'Fournisseuren an d'Prestataires de services, déi d'Caritas huet.”
Domat wier sengen Informatiounen no och séchergestallt, datt den “Embryo vun der Caritas” seng Aktivitéite kéint weiderféieren.
Mindestloun: Equiliber muss fonnt ginn
Zum Budget 2025 huet de Gilles Roth betount, datt Lëtzebuerg eng kompetitiv Wirtschaft bréicht. Dat kéim awer mat gewësse Konditiounen.
"Wa mir gären eng kompetitiv Wirtschaft hunn, da kann de Staat net vun uewen erof diktéieren, datt de Mindestloun ëmmer permanent, permanent an d'Luucht geet, an datt kee Mënsch méi Leit astellt. Well de Patron mécht och ëmmer seng Rechnung, muss och kucken, datt säi Betrib wirtschaftlech funktionéiert."
Genau dofir misst de Patron e gesonden Equiliber fannen, esou nach de Finanzminister.