Dem Trump seng Decisioun bréngt déi gréisst fundamental Ännerung an der globaler Handelspolitik zënter 80 Joer. Eng direkt Konsequenz den Ament ass e Réckgang op de Bourse. An den USA ass den Aktienindex Dow Jones ëm 5,5 Prozent gefall, op deen déifsten Niveau zënter Covid. Staark Bourse-Réckgäng gouf et och ënnert anerem zu Frankfurt a London.
Géigentaxen
De Chef vun der amerikanescher Zentralbank, Jerome Powell , huet viru weider negativen Auswierkunge vum Donald Trump senger Decisioun iwwert d‘Douanes-Taxe gewarnt. Et wier ganz warscheinlech, datt déi nei Taxen op d‘mannst eng Zäit laang d‘Inflatioun an den USA wäerten erop an de Wirtschaftswuesstem erof zéien.
E puer Länner hu Géigentaxen decidéiert – China huet och Taxe vu 34 Prozent annoncéiert op amerikanesche Produiten a gesot, Peking wéilt bei der Welthandelsorganisatioun kloen. D‘EU Kommissioun ass am gaang huet Géigentaxen ze iwwerpréiwen.
Den Donald Trump huet sech bereet gewisen, mat anere Länner nach iwwert d‘Import-Taxen ze verhandelen.
Demoe géint den Donald Trump
An den USA sinn um Samschdeg gréisser Protester géint de President Donald Trump geplangt. Hien ass zënter 10 Wochen am Amt.
Zéng Dausende Leit ginn op de Stroosse vun der Haaptstad Washington an aneren amerikanesche Stied erwaart.
Enn Mäerz hat et scho Protester géint dem Trump säi Beroder Elon Musk ginn – dat ënner anerem, wéinst deem vum Elon Musk ëmgesaten Ofbau vun Dausenden Aarbechtsplazen an de Ministèren an Administratiounen.
