A gutt engem Mount wäerte Vertrieder vun der Spuerkeess den Deputéierten aus der Caritas-Spezialkommissioun Ried an Äntwert stoen. Dat huet de President vun der Chamber-Spezialkommissioun Charles Weiler (CSV) um Mëttwoch ugekënnegt.
Bis elo war nach kee Vertrieder vun der Spuerkeess a vun der BGL BNP Paribas an der Caritas-Spezialkommissioun vun der Chamber.
Enquêtë vu Justiz, CSSF an EZB
Bei der Caritas goufen d’lescht Joer 61 Milliounen Euro geklaut. D’Finanzdirektesch huet d’Suen an d’Ausland iwwerwisen. Si behaapt, si wier vu Kriminellen erageluecht ginn, déi sech als hiren Direkter ausginn hunn. D’Viremente goufen haaptsächlech iwwer d’Spuerkeess gemaach, mee och iwwer d’BGL BNP Paribas.
Wéinst de verschiddene Bank-Volete lafen den Ament Enquêtë vun der Justiz, vun der Iwwerwaachungsautoritéit vum Finanzsecteur (CSSF) a vun der Europäescher Zentralbank (EZB).
