Wa Lëtzebuerg vum 1. Januar 2026 op déi 2 Prozent géif eropgoen, da wieren dat 400 Milliounen Euro zousätzlech zu deenen 800 Milliounen Euro, déi den Ament am Budget virgesi sinn. Déi Hypothees stellt de Finanzminister op. 1,2 Milliarden Euro misst Lëtzebuerg dann all Joer an d'Verteidegung investéieren.
Defizit 10 Prozent vun dem, wat prognostizéiert gouf
Dozou seet de Gilles Roth, datt d'Zuelen den Ament besser ausgesi wéi viru 15 Méint, wou d'Regierung un d'Rudder koum.
"Wou mer zu Senneng gesot kruten, datt mer praktesch en Defizit fir 2024 hätte vun 3,2 bis 3,6 Milliarden Euro, wat den eigentleche Staat ubelaangt. Ech hunn déi leschten Zuelen, déi däerfe sech ëm 300 bis 400 Milliounen Euro Defizit beweegen."
10 Prozent vun deem also, wat prognostizéiert gouf.
Schold, Reprioriséierung an aussebudgetär Mëttelen
Fir d'Militärausgabe misst Lëtzebuerg déi iwwer verschidde Quelle gedeckt kréien. Engersäits duerch d'Schold, fir déi een awer am Beräich vun den 30 Prozent Maximalverscholdung wëllt bleiwen.
Eng weider Pist wieren ausserbudgetär Mëttelen oder nach eng Reprioriséierung vun den Investissementsausgaben.
Un déi agefruere russesch Fongen dierfen d'EU-Länner iwwerdeems net goen, ënnersträicht de Gilles Roth. Och wann eng Rei Länner dat fuerderen.
