Den Donald Trump sot, hien hätt e Bréif vum Wolodymyr Selenskyj kritt, an deem den ukrainesche President sech bereet erkläre géif fir zeréck un de Verhandlungsdësch ze kommen. Dat sot den Donald Trump a senger éischter Ried virum Kongress a senger neier Amtszäit.
Am Bréif géif de Selenskyj schreiwen, d'Ukrain wier bereet, ënner der Leedung vun den USA e Fridde mat Russland auszehandelen. Gëschter um Dënschdeg hat den ukrainesche President eng Wafferou an der Loft an um Waasser proposéiert, fir mat Friddensverhandlungen unzefänken.
Éischt Ried am Kongress vum Donald Trump
"Amerika wier nees do" war deen allgemengen Haaptmessage vum President Trump senger Ried. Hien hätt a sechs Woche scho méi erreecht, wéi anerer a véier Joer, an dat wier eréischt den Ufank, esou den Donald Trump. Hien huet weider Douanestaxen annoncéiert. Déi sollen den 2. Abrëll a Kraaft trieden, ënner anerem op den Importer vun Autoen an d'USA. Dovu wäert och d'EU betraff sinn.
Um innepolitesche Plang huet den Trump ënner anerem déi ëmstridde Spuermesurë vum Elon Musk gelueft. Deen nei Büro ënner senger Leedung mam Numm Doge hätt schonn iwwer 100 Milliarden Dollar agespuert.
