De Premier Gabriel Attal, de Chef vum Rassemblement National Jordan Bardella, an de Manuel Bompard vum lénken Nouveau Front Populaire sti sech haut an engem Debat géintiwwer, deen den Owend um 21 Auer op TF1 leeft.
Net invitéiert goufen déi konservativ Les Républicains, déi dëst als Benodeelegung ugesinn a sech dowéinst un de Conseil d’État adresséiert hunn.
Den Debat versprécht hëtzeg ze ginn. De President Emmanuel Macron hat gëschter schonn am Podcast "Génération Do it Yourself" kloer Wierder fonnt fir ze beschreiwen, wat passéiere kéint, sollt den RN oder den Nouveau Front Populaire un d’Muecht kommen.
RN: Schouluniformen a keen Droit du sol
De Jordan Bardella hat iwwerdeems gëschter de Programm vu senger Partei presentéiert. Ënner anerem wëllt hien d’Schouluniformen aféieren an Handyen an de Schoule verbidden. Och soll den Droit du sol ofgeschaaft ginn, fir datt Kanner, déi a Frankräich gebuer ginn, net automatesch d’Nationalitéit kréien.
Doniewent wëllt de Bardella och den irregulären Openthalt nees kriminaliséiere fir et méi einfach ze maache Persounen ouni Openthaltserlabnis ze expulséieren.
Alles Punkten, déi sécherlech haut den Owend net ouni Géigewand wäerte bleiwen.
Max Tholl