Zanter 2002 gehéiert den 3. Freideg am November weltwäit der Philosophie. D'Geschicht léiert eis, datt de Mënsch ëmmer beméit war, iwwer sech selwer erauszewuessen, sief et duerch d'Entdeckung vun neie Kontinente, d'Ënnersichung vum Weltall oder d'Entfalung vum mënschleche Verstand duerch Konscht a Wëssenschaft - dat souwuel a Fridden- wéi och zu Krichszäiten. Mee an eiser aktueller Zäit vu rasanten technologeschen a wëssenschaftlechen Innovatioune stellt sech d'Fro: Wéi wäert de Mënsch vun der Zukunft ausgesinn?
D’Erausfuerderunge vum Fortschrëtt
D'technologesch Revolutioun huet schonn haut immens Auswierkungen op eisen Alldag. Kënschtlech Intelligenz, Gentechnik, Robotik – all dës Entwécklunge stellen d'Fro, wéi mir als Gesellschaft mat den Erausfuerderungen ëmgoe wäerten, déi mat dëse Fortschrëtter verbonne sinn. Kloer ass: dës dierfen net dozou féieren, datt mir de Kär vun eiser Mënschlechkeet verléieren.
Et schéngt, mir stinn op der Schwell zu enger neier Ära, an där d'Grenzen tëschent Mënsch a Maschinn verschwammen. D'Iddi vum Transhumanismus gewënnt u Popularitéit, wärend Wëssenschaftler nodenken, wéi d'Technologie bäidroe kann déi mënschlech Leeschtungsfäegkeet ze verbesseren a souguer d'Bio-Grenze vum Liewen ze iwwerwannen.
Mee matten an dëse spannende Méiglechkeete musse mir och dat ethescht Minnefeld am Ae behalen, dat mat sou Verännerunge verbonnen ass. D'Responsabilitéit, déi mat der Gestaltung vun der Zukunft verbonnen ass, brauch eng déif philosophesch Reflexioun iwwer d'Auswierkunge vun eisen Entscheedungen op d'Mënschheet als Ganzt.
Fro vun Ethik a Moral
Deemno stellt sech eng zentral Fro: Wéi kënne mer sécherstelle, datt de Mënsch vun der Zukunft net nëmmen technologesch avancéiert ass, mee och ethesch a moralesch? De Fortschrëtt soll net nëmmen drop ofzilen, d'physesch Fäegkeeten ze verbesseren, mee muss och déi moralesch a sozial Aspekter vum Mënsch betruechten.
Vläicht kënne mir vun de philosophesche Schoulen aus der Vergaangenheet léieren, fir d'Zukunft beduecht a virsiichteg ze gestalten. D'grouss Denker vun der Geschicht hunn ëmmer erëm betount, déi wierklech Gréisst vum Mënsch läit net nëmmen a senge Fäegkeete, mee virun allem a senger Fäegkeet empathesch, verständnisvoll a gerecht ze sinn.
D'Entwécklung vum Mënsch dierf net nëmmen op wëssenschaftlechen a technologesche Fortschrëtter berouen, mee och op engem déiwe Respekt vun der Ëmwelt, de Matmënschen an de kulturellen Ënnerscheeder. De Mënsch vun der Zukunft muss an der Lag sinn, d'Erausfuerderunge vun enger globaliséierter Welt unzehuelen, ouni dobäi d'Wäerter ze negligéieren, déi d'Grondlag vun enger humaner Gesellschaft sinn.
Tëschent Wourecht a Fiktioun
Eng Schlësselkompetenz fir de Mënsch vun der Zukunft kéint an der Bildung an dem kriteschen Denke leien. An enger Welt, déi vun Informatiounen iwwerschwemmt gëtt, kann d'Fäegkeet tëschent Wourecht a Fiktioun ze ënnerscheeden entscheedend sinn. Bildung soll net nëmmen technesch Fäegkeete viséieren, mee och op d'Entwécklung vun engem staarken ethesche Kompass an enger déiwer Empathie fir anerer.
D'Zukunft vum Mënsch läit an eisen Hänn an den UNESCO-Dag vun der Philosophie erënnert eis dorun, datt d'Zukunft net virausbestëmmt ass, mee datt si d'Richtung vun eisen Entscheedungen, Iwwerleeungen an Handlungen ass. Loosst eis zesummen eng Zukunft gestalten, déi net nëmme fortschrëttlech, mee virun allem och mënschlech ass an hoffe mer, datt och d'Regierung vu muer dësem Challenge gewuess ass.
Mam Zil fir déi ëffentlech Debatt ze fërderen, invitéiert de radio 100,7 am Fräie Mikro Leit aus der Zivilgesellschaft fir aktuell Theemen ze kommentéieren. De Fräie Mikro ass e Gaaschtbäitrag mat Richtlinnen, am Respekt vun eisem Cahier des Charges, ënner der finaler Responsabilitéit vum radio 100,7.
