De Marc Baum hat sech doran op den Artikel 41 vum Gemengegesetz beruff, no deem den Inneminister kann decidéieren, e Schäffen am Fall vun notoreschem Feelverhalen, Feeler oder schwéierer Farlässegkeet vu sengem Amt ze enthiewen.
De Politiker vun déi Lénk wollt deemno vum Minister wëssen, op de schwéiere Steierbedruch, wéinst deem de Pim Knaff veruerteelt gouf, ënnert dës Kategorie fält.
Léon Gloden: Urteel hat näischt mat der politescher Tätegkeet ze dinn
De Léon Gloden stellt a senger Äntwert fest, datt d‘Riichter dem DP-Politiker säi Recht sech fir Walen opzestellen an ze wielen, net oferkannt hätten. Säi Mandat als Escher Schäffen wier deemno net a Fro gestallt.
Vue datt hie wéinst Aktivitéiten a sengem Beruffsliewe verurteelt gi wier, déi näischt mat senger politescher Tätegkeet ze dinn hätten, géif de Minister sech do net amëschen.