Dem Theater, Film, Varieté, also am Fong dem Divertissement, géif hei zu Lëtzebuerg eppes feelen, wann et hien net gi wier: de Fernand Fox
Den Acteur a Sänger huet engem mat senge Lidder, Sketcher a sengem komeschen Talent vill Freed gemaach, hie wosst dernieft awer och a méi eeschte Rollen ze iwwerzeegen.
De Fernand Fox huet vill verschidde Facetten, et erënnert ee sech sécher u seng Assurance-Reklammen zesumme mam Marc Olinger, seng Rollen an den Andy Bausch-Filmer oder méi wäit zeréck u seng Optrëtter am Kasemattentheater zesumme mam Tun Deutsch.
Et ass méi roueg gi ronderëm de Fernand Fox an de leschte Joren, mee nach ëmmer huet een d’Bild vun him virun Aen, wéi hien do steet, natierlech mat der Zigarett am Grapp, an op seng Manéier schmunzelt.
De Fernand Fox ass de 26. Januar 1934 zu Bollendorf Pont gebuer. Mee wann een ufänkt zeréckzedenken, da seet ee sech, am Fong kennen ech de Fernand Fox schonn éiweg laang, net nëmmen aus dem Theater, mee schonn als Kand hunn ech de Fernand Fox sonndes op der Televisioun gesinn, am gudden alen Hei Elei Kuck Elei.