D'Derya Yildirim mam Grupp Simsek huet en neien Album, deen "Dost 2" iwwerschriwwen ass, pueren Hunneg aus Anatolien!
Wann esou munch Integratiouns-Projete schwiereg sinn oder scheiteren, muss dat un der Handhabung leien, wéi Mënschen aus verschiddene Kulturkreesser zesummegeféiert ginn. De Beweis, datt et méiglech ass, verdäitlechen d'Artisten ëmmer erëm. Een esou e Projet ass "Sowal Diabi", dee sech mam Theema Migratioun ausenanersetzt, virun allem mam Kultur-Austausch als Beräicherung fir all d'Bedeelegter.
Connectioun an Austausch tëschent Museker aus verschiddene Kulturen och beim Kora Virtuos Ballaké Sissoko. Den Album "Djourou" koum d'lescht Joer eraus an Djourou bedeit fir den Artist, déi Säit, déi hie mat anere connectéiert.
De Keyvan Chemirani huet fir den Album "Hâl" säi Brudder Bijan, seng Schwëster Maryam an de Flüttist Sylvain Barou zesummebruecht fir eng Rees vun de persesche bei déi indesch Kläng, op hirem Wee passéiere si an der Bretagne, an Irland an a Schottland, an dobäi huet een hei ni d'Impressioun, datt onbedéngt e moderne Metissage erauskomme muss, mee et erkléngt en authenteschen Dialog.
Och de marokkanesch-belsche Sänger, Performer an Aktivist Jaouad huet et zu senger Missioun gemaach d'Mënschen zesummenzebréngen iwwer de Wee vun der Konscht an dem Dialog. Den Album "Messias" koum 2021 eraus.
De Steve Shehan ass e Weltebummler a Multi-Instrumentalist, virun allem awer Perkussionist. Mir héieren hei en Extrait aus "Visa Mundi", dat ass deen éischten Album vum Coffret "V.I.S", deen 2018 erauskoum.
Elouan Jégat alias Skøpitone Siskø ass e bretonesche Museker. Dir héiert en éischten Extrait vu senger Aktualitéit "Remember Tomorrow".
De Grégoire Jokic ass e franséische Pianist a Komponist, deen op sengem neien Album "Kairos" de Piano mat der Electro verbënnt.
Eriwwer mat den duusse Kläng ass et bei The Brian Jonestown Massacre hirem Helen Album "Fire Doesn't Grow on Trees". Et ass den 19. Studio-Album vun de Kalifornier.