"Dëst Stéck ass net just als Admiratioun fir e kultivéierten Artist geschriwwen, mee als Duett tëschent eis", sot de Komponist Tan Dun 2012 virun der éischter Opféierung an den USA vu sengem Wierk "The Tears of Nature". Gemengt war de Perkussionist Martin Grubinger, deen d'Wierk zesumme mam Los Angeles Philharmonic Orchestra opgeféiert huet. Elo interpretéiert de Solist dëst Wierk zesumme mam Philharmoneschen Orchester Lëtzebuerg (OPL) ënner der Direktioun vu sengem Chefdirigent Gustavo Gimeno.
Et wier eng faarweg Kompositioun, déi perfekt bei eng blénkeg Saisonsouverture passt, steet am Programm vun der Philharmonie ze liesen. Dës Ausso bezitt sech souwuel op dem Tan Dun säi Wierk, wéi och op dat zweet Stéck op der Affiche: Dem Richard Strauss säin "Heldenleben". Nom Wierk fir Perkussioun an Orchester geet et mat dëser Kompositioun genee esou klanggewalteg weider: ënner anerem aacht Coren, fënnef Trompetten, dräi Posaunen a véierfach besaten Holzbléiser verlaangt de Richard Strauss niewent de Sträicher. Mat all dësen Instrumenter verzielt den OPL d'Geschicht vum Protagonist, dem "Held" a sengem "Widersacher". Ëmmer erëm gëtt spekuléiert, de Strauss hätt sech an dësem Wierk selwer als Held duergestallt, wärend d'"Widersacher" - eventuell dem Strauss seng Kritiker - atonal quiitschen.
Programm:
Tan Dun: Concerto fir Perkussioun: The Tears of Nature
Richard Strauss: Ein Heldenleben
Martin Grubinger, Perkussioun
Philharmoneschen Orchester Lëtzebuerg
Gustavo Gimeno, Direktioun
