De Sample vun der Woch
Al Green - I'm Glad You're Mine
8 min
Ee vun de bekanntsten Drum Loops aus dem Hip-Hop staamt vum Soul- an Gospel Sänger Al Green mat "I'm Glad You're Mine". Dat war op sengem fënneften Album: "I'm Still In Love With You", 1972 bei Hi Records erauskomm. Den Al Green ass gebuer am Arkansas, USA a mëttlerweil 75 Joer al. Hie sengt zanter hien néng Joer al ass a war mat senge Bridder an der Kierch an engem Gospelchouer. Hie war schonn an den 1950er op Tour mat senger ganzer Famill. Säi Papp geheit hie mat 16 aus der familiärer Gospel Grupp eraus, wéi en hien erwëscht Jackie Wilson ze lauschteren. (Dat war e bëssen eng R'N'B Popstar mat engem schlechte Ruff zu där Zäit.) De Green probéiert verschidde Gruppen, mee keng ass wierklech erfollegräich, bis hie sech am Solo Akt probéiert. Zesumme mam Produzent Willie Mitchell enchaînéiert hien direkt véier Albumen an dräi Joer, dovun och "Let's Stay Together" am Januar and "I'm Still in Love with You" am Oktober 1972. D'Seventies ware seng beschten Zäit. Hien ass ee vun den éischte Soulsänger, deen an den 70er erausgestach huet. Säi Stil ass eng Mëschung tëschent energeschem Philadelphia-Soul a smoothen Deep-Soul, gemixt mat ville sexy Uspillungen. Seng éischt Albume passe perfekt an hir Zäit a si vergläichbar mat aner Albume wéi zum Beispill Marvin Gaye "What's Going On", Stevie Wonder "Talking Book" a Curtis Mayfield "Super Fly" Soundtrack. Nom Selbstmord vu senger Ex-Frëndin gëtt hie Mëtt-70er Paschtouer a keeft sech eng Kierch zu Memphis. Wann hien elo nach sengt, hëlt hie quasi just nach Gospel op.
Seng Perkussioun gouf méi wéi 180 Mol gesampelt, ee vun de bekanntste Beispiller ass den The Notorious B.I.G. mat "Dead Wrong" (Feat. Eminem). Dat war op deem sengem drëtten Album "Born Again", 1999 bei Bad Boy erauskomm, also dräi Joer nom Doud vum Brooklyn Rapper. Et ass gréissten Deels eng Collage vu verschiddene Lidder, déi de Biggie virun sengem Doud opgeholl huet, gemixt mat Featurings vun den deemools beschte Rapper, wéi de Method Man, Redman, oder hei den Eminem. Den Drum Sample ass quasi net iwwerschafft, et komme just e puer Synth-Nouten driwwer. De Biggie hat dëst Lidd ursprénglech als Freestyle um Mister Cee senger "Best Of Biggie" Mixtape opgeholl.
Mee den Akinyele hat de Sample scho virdru benotzt an zwar op senger "Put It In Your Mouth EP" vun 1996. Am Lidd geet et ëm genee dat, wat ee mengt. Et ass sexistesche Gangsta Rap aus den Ufank 90er. Dësen Niveau u Vulgaritéit war virdrun nach ni do. Dofir hat dat Lidd och richtege Succès an der Underground-Community.
E puer Méint virdrun hat The East Flatbush Project d'Lidd och scho benotzt, an zwar op sengem "Tried By 12". Den MC aus Flatbush hat net vill Releasen, mee deen dote war en Hit. Quasi all Rapper huet schonn emol iwwer dee Beat gerappt, well et dee beléiftste Beats wärend MC-Battles ass. Den DJ Premier huet e souguer op enger berüümter MC-Cypher benotzt, an zwar 2011 bei den BET Awards op MTV.
Mee de Large Professor hat de Sample nach virdrun benotzt, an zwar fir de "Mahogany" vum Eric B. & Rakim ze bauen. Dee war op sengem drëtten Album "Let The Rhythm Hit 'Em" vun 1990. Et ass e bësse méi en introspektiven Album, souguer den Album vun der Maturitéit, géif ech soen, woubäi dëst Lidd hei e bëssen d'Ballad dovunner ass. De Rakim seet, hie wier op dësem Lidd vun der Diana Ross hirem Film "Mahogany" vun 1975 inspiréiert gewiescht.
Episoden
Samuel Jonathan Johnson - My Music
Den Johnson huet mat 14 Joer ugefaangen Uergel ze spillen a gouf séier bekannt als ee vun de beschten Uergelspiller an den New Yorker Kierchen. An der Arméi entdeckt hien den Jazz.
Tom Browne - Funkin' for Jamaica (N.Y.)
De Browne war ursprünglech u klassescher Musek interesséiert, mee huet den Jazz als Student Mëtt vun de 70er op der Uni entdeckt.
A Taste of Honey - Rescue Me
A Taste of Honey war eng amerikaneschen Disco-Soul-Grupp vu Los Angeles, déi 1972 vu Janice-Marie Johnson a Perry Kibble gegrënnt gouf.
One Way - Cutie Pie
One Way war eng amerikanesch R&B a Funk Band, déi an de spéiden 1970er an Ufank den 1980er Jore populär war, dirigéiert vum Al Hudson.
Melissa Morgan - Fool's Paradise
D'Joyce Melissa Morgan, kuerz Meli'sa genannt ass eng amerikanesche R&B a Soul Sängerin a Songwriterin.
Maze - Before I Let Go
Maze, och bekannt als Maze Featuring Frankie Beverly ass eng amerikanesch Soulband, déi vum Frankie Beverly zu Philadelphia am Joer 1970 gegrënnt gouf.
The Brothers Johnson - Tomorrow
The Brothers Johnson waren eng Funk-, Disco- an R'n'B-Band, déi vun 1975 bis 1982 aktiv war.
Quincy Jones - Summer in the City
De Quincy Jones, gebuer de 14. Mäerz 1933, ass en amerikanesche Plackeproduzent, Museker, Songwriter, Komponist, Arrangeur a Film- an Televisiounsproduzent.
Ramsey Lewis - Tambura
Deen amerikaneschen Jazzkomponist, Pianist a bekannte Radio-Moderator, 1935 zu Chicago gebuer, ass leschte September am Alter vu 87 Joer gestuerwen.
DeBarge - I Like It
DeBarge war eng amerikanesch Grupp aus Michigan, déi aus verschiddene Membere vun der DeBarge Famill bestanen huet, aktiv tëschent 1979 an 1989.
Joe Cocker - Woman to Woman
Deen englesche Sänger war fir seng rau a blueseg Stëmm a seng charismatesch live Optrëtter bekannt.
The Main Ingredient - Summer Breeze
Déi amerikanesch Soul a Funk Grupp The Main Ingredient gouf 1964 am Harlem, New York City gegrënnt.
Dynasty - Adventures in the Land of Music
An den 1980er war de Label Solar Records vergläichbar mat Motown a Stax an den 1960er oder Philadelphia International an den 1970er.
Sister Sledge - He's the Greatest Dancer
Sister Sledge ass eng amerikanesch Grupp an besteet aus den Schwësteren Debbie, Joni, Kim a Kathy Sledge.
The Time - 777-9311
De Grupp The Time ass en Niewenprojet vum Prince. All d'Musek an d'Texter si vun him geschriwwen, mee gi vu The Time live op der Bün interpretéiert.
Dionne Warwick - Walk On By
En Dosende Mol gecoverte Pop-Standard
Led Zeppelin - When the Levee Breaks
Gegrënnt 1968, mat 300 Millioune verkaaften Albe ware Led Zeppelin eng vun den erfollegräichste Bands iwwerhaapt.
Art of Noise - Moments In Love
1983 huet déi englesch experimentell Grupp, bekannt fir hir Sound-Collage-Techniken an hir avantgardistesch Approche dozou, dëst Lidd erausbruecht.
The Winstons - Amen, Brother
Den Amen Break huet ganz Generatioune vu Beatmaker erzunn a gouf iwwer 5.000 Mol wärend de leschten 30 Joer gesampelt.
