De Gil Scott-Heron huet 1971 d'Lidd "The Revolution Will Not Be Televised" op sengem éischten Album "Pieces Of A Man" erausbruecht, um Label Flying Dutchman. De Gil Scott-Heron war en Aktivist, Jazz-, Soul- a Blues-Dichter. Hie war och en engagéierte Songwriter a spoken word Kënschtler aus de 70s an 80s. Éier hie Placken opgeholl huet, war hie Literatur Professer op der Uni. Hie gouf an der Bronx an am Tenessee grouss. Seng Stroosse-Poesie huet d'Fondatioune fir de Rap vun hautdesdaags geluecht. Seng éischt Plack "Small Talk" ass quasi just spoken word, hie liest do seng Gedichter iwwer Perkussiounen. Op senger zweet Plack, wouvun dat heite Lidd ass, sinn e bësse méi traditionell Track-Strukturen. Et ass säin éischte Studio Album mat enger ganzer Band hanner him, geleet vu sengem ale Kolleeg Brian Johnson um Piano. Hie benotzt hei Jazz- a Blues-Instrumentatioune fir sech drop ausdrécken. The Last Poets waren eendeiteg seng Virbiller, säi Lidd "The Revolution Will Not Be Televised" war eng direkt Äntwert op hiren Titel "When The Revolution Comes". Säi Lidd ass en aggressiivt a polemescht Gedicht géint Massemedien. Et gëtt heiansdo als dat éischt Rap-Lidd an der Geschicht ugesinn. De Message gouf vu ville Rapper iwwerholl oder zumindest zitéiert.
Ee vun den bekanntste Lidder mat enger direkter Referenz un de Gil Scott-Heron ass de Common mat sengem Lidd "The 6th Sense" aus dem Joer 2000. Dat war op sengem véierten Album "Like Water For Choclate". D'Produktioun ass vum onverkennbaren DJ Premier. Et ass e positiven an optimisteschen Track op engem bombastesche Beat.
Eng aner Utilisatioun vum Sample ass och zum Beispill d'Queen Latifah op hirem Lidd "Evil That Men Do" Featuring Krs One. Dat war op hirem éischten Album "All Hail The Queen". Et koum 1989 bei Tommy Boy Records eraus. Si iwwerhëlt hei de Message an de Beat vum Gil Scott-Heron op hirem feministeschen a militanten Track.
Eng Mention Honorable kréien och Le Peuple de l'Herbe mat hirem Lidd "PH Thème". Dat staamt vun hirem Album "Triple Zero" vun 2001. Le Peuple de l'Herbe ass eng Trip-Hop Band vu Lyon, Frankräich. Si iwwerhuelen hei déi puer éischt Sekonne vum Heron sengem Lidd. Ech ka mech un dee geniale Video Clip aus Plastilinn erënneren, dee ganz an enger Rill vun enger Plack gedréit gouf.
