1976 ass dëst Lidd hei erauskomm : "Love Hangover" vum Diana Ross. Hat ass een vun deenen erfollegräichsten Artisten iwwerhaapt an hat schon méi wei 70 Lidder an den Charts, dovun 12 Nummer 1. Hits an den USA, notamment dat heiten Lidd. Hat kennt aus der golden Era vum Label Motown an war en Member vun der Grupp "Supremes" an 60 Joren. Fir dëst Lidd opzehuelen huet hat anscheinend drop bestanen en Stroboskop am Opnahmestudio ze hunn fir richteg an den Disko Feeling eranzekommen. D'Lidd fänkt mat engem verféiereschen luesen Tempo un an hält an enger epescher Disko Hymne op. Di onbesuergt Approche vum Ross huet zum Succès vum Lidd bäigedroen. D'Diano Ross trëtt hei offensichtlech fir d'Ermächtegung vun den Fraen an. Et sinn etlech Remixen an Reinterpretatiounen vun dësem Lidd erauskomm, d'Lidd ass och um Soundtrack vum Film "Paris is Burnung". D'Diana Ross haat suguer en Optrëtt bei an der Muppets-Show mat dësem Lidd, mee mir schwätzen haut iwwert en aneren Genre, an zwar den Gangsta-Rap vun Bone Thugs-n-Harmony.
Si hunn dem Ross säin Lidd gesampelt fir "Ready 4 War" doraus ze maachen. Dat war op hirem 3. Album "The Art Of War". Bone Thugs-n-Harmony kommen aus Cleveland an haten massiv vill Hits Ufank vun den 90. Joren. Hieren ganzen Album ass produzéiert vum DJ Uneek. Et war en kommerziell erfollegräichen duebelen Album, deen awer definitiv ze laang war. Hieren rasanten Erfolleg huet zu internen Konflikter gefouert, sou dass si sech kuerz Zäit duerno getrennt hunn. Den Sujet vun hirem Lidd huet lo net sou vill mam Original ze dinn, net sou wei dat nächst Beispill.
Mir schätzen elo vum Lidd "The Other Level" vun der Grupp Ghetto Boys. Den Rapper Bushwick Bill dréint hei definitiv den Message vum Diana Ross em an schreift en ganz Fraen feindlechen Text. Dat huet dann och dozou gefouert dass hien genau sou wei den Rapper Ice-T oder d'Grupp 2 Live Crew vun sengem Label zenséiert ginn ass. Dat war natierlech eng enorm Pub fir hien. D'Geto Boys sinn deelweis verantwortlech fir d'Grënnung vum Gansta Rap an dem Horrorcore Genre. Si schwätzen gréissten Deels iwwert Gewalt, mentalen Breakdown oder Selbstmordgedanken. Dat war op hirem 2. Album "We Can't Be Stopped" vun 1991 ze fannen.
Dat nächst Beispill ass och definitiv keen Libeslidd, an zwar "Gansta Bitch" vum Rapper Master P. Feat. Steady Mobb'n & Mo B. Dick. Dat war ze fannen op sengem Album "MP The Last Don" vun 1998. Hien huet dat natierlech op sengem eegenen Label No Limits Records erausbruecht. Den Masta P ass nämlech dofir bekannt en ganzen Underground Imperium opgebaut ze hunn ouni jeemools bei enger Major ënnerschriwwen ze hunn. Hien ass mat onendlech vill Artisten op sengem Label zu engem Multimillionär ginn. Hien ass definitiv en Business Model fir villen vun sengen Nofollger ginn.
Lo awer ganz um Enn nach eng Kënschtlerin déi dem Diana Ross säin feministeschen Message trei iwwerhëlt. Et geet hei em d'Monica mat "The First Night". Dat war en Lidd vun sengem 2. Album "The Boy is Mine" deen 1998 erauskomm ass. D'Produktioun ass vun Jermaine Dupri an dat ganzt ass op Soso Def erauskomm.
