De Lowell Fulson a säin Lidd "Tramp": 1966 an e soulescht Blues-Lidd. De Lowell Fulson war eng Westcoast Blues-Legend. Hie war Gittarist a Songwriter an hat vill Hitte wärend de 40er an 50er Joren. Hien huet souguer a senger Jugend mat Leit wei Ray Charles oder BB King collaboréiert. Wéi säin Label Kent Records säi Lidd fir d'éischte Kéier héieren huet, war e skeptesch, mee déi éischt DJe vun der Epoch hunn Drock op den Label gemaach fir d'Lidd ze releasen. Si hunn de Potential vun dësem Lidd erkannt, inhaltlech geet et nämlech ëm d'Jugend, déi d'Kritik vun deenen Eleren ignoréiert.
Dëst Lidd gouf Dosende vu Kéieren am Hip-Hop gesampelt, hei e puer Beispiller: Den Wu-Tang Clan huet "Protect Your Neck (The Jump Off)" am Joer 2000 doraus gemaach. D'Produktioun ass vum RZA an d'Lidd war op hirem drëtten Album "The W", deen op Loud erauskoum. D'Lidd ass am Fong e Remix vun hirem eegenen "Protect Your Neck". Dat war hir éischt Maxi, déi 1992 op hirem éischten Album "Enter The 36 Chambers" erauskoum. An der Tëschenzäit war leider den Ol' Dirty Bastard verstuerwen, dofir gouf hien op dëser Versioun duerch de Cappadonna a Masta Killa ersat.
Eng aner Utilisatioun vum Sample wier d'Beispill vun der Grupp EPMD. Si hunn d'Lidd "Rampage" domadder gemaach, "featuring LL Cool J" vum Label Def Jam. D'Produktioun war vum DJ Scratch an dat war ze fannen op hirem drëtten Album "Buisness As Usual", deen 1990 erauskoum.
Cypress Hill hunn och hir alleréischt Maxi mat dësem Sample produzéiert, an zwar "How I Just Could Kill A Man" vun 1991. Mee mäin Liiblings-MC-ever, de Redman, huet dat Lidd och benotzt fir "Time 4 Sum Aksion". Hie sampelt hei vill Elementer, mee een dovunner ass eben de Lowell Fulson. Dat Lidd koum 1992 op sengem Album "Whut? Thee" Album eraus an et war produzéiert vum Eric Sermon.
Eng méi aktuell Utilisatioun vum Sample ass zum Beispill den Action Bronson a säi Lidd "Strictly 4 My Jeeps". Dat koum op der EP "Saab Stories" 2013 eraus a war produzéiert vum Harry Fraud. Hien huet souguer nodréiglech e Remix vun dësem Lidd gemaach, wou hien den LL Cool J drop agelueden huet, geneesou wei EPMD 20 Joer virdrun.
