Europa dierft sech näischt vun den USA diktéiere loossen, soss géif ee riskéiere „gefriess“ ze ginn, huet de Xavier Bettel ënnerstrach.
Den Ausseminister huet betount, datt d’Zesummenaarbecht net zur Ofhängegkeet dierft ginn. D’Europäer misste sech méi selbstbewosst an onofhängeg positionéieren.
Xavier Bettel: Oppe fir Verhandlunge bleiwen
Am 100,7-Interview huet de Lëtzebuerger Ausseminister betount, datt Europa misst oppe bleiwen, fir Verhandlunge mat den USA. Mee et sollt ee sech net alles gefale loossen.
Et wier elo wichteg, eng gemeinsam europäesch Äntwert virzebereeden, an déi richteg Propose gezilt op den Dësch ze leeën, esou den Ausseminister.
Luc Frieden: USA sinn “historesche Frënd an Alliéierten“
Och de Premier Luc Frieden (CSV) huet am 100,7-Interview betount, datt een elo op den Dialog misst setzen.
D’Relatioune mat den USA wiere wichteg, trotz de momentane Spannungen. D'USA géif een „historesche Frënd an Alliéierte“ bleiwen, huet de Premier widderholl.
De Luc Frieden huet betount, datt et elo un der EU-Kommissioun wier, Gespréicher mat Washington ze féieren.
Wann dës Gespréicher awer net zu engem Erfolleg sollte féieren, da missten och Mesuren op europäescher Säit preparéiert ginn.
