Wann déi europäesch Staats-a Regierungscheffe muer um Donneschdeg zu Bréissel iwwert d’Sécherheetslag an Europa schwätzen, dann huet den däitsche Kanzler e grousse Package an der Valiss. Oder, besser gesot: Hien huet d’Aussiicht dobäi, datt Däitschland sech un der europäescher Verteidegung an Zukunft ka bedeelegen.
Dat, well Unioun an SPD an hire Sondéierungsgespréicher den Dënschdeg decidéiert hunn, massiv an d’Verteidegung an an déi däitsch Infrastruktur z’investéieren.
Unioun an SPD sinn op déi Gréng oder op d'FDP ugewisen
Dem Kanzler huet de Friedrich Merz, zesumme mam CSU-Landesgruppechef Alexander Dobrindt an der SPD-Duebelspëtzt Lars Klingbeil a Saskia Esken d’Pläng presentéiert. Fir datt déi vun Unioun an SPD awer tatsächlech kënnen ëmgesat ginn, muss de Bundestag – an zwar nach a senger aler Zesummesetzung – nach mat enger Zweedrëttel-Majoritéit d’Verfassung änneren. Dobäi sinn déi zwou Parteien, déi déi nächst Regierung wëlle stellen, op Hëllef ugewissen - zum Beispill vum B90/Die Grünen oder der FDP.
Eng Garantie, datt déi dat matdroen, gëtt et net – am Walkampf hat de Friedrich Merz sech nämlech ganz däitlech géint eng Reform vun der Schuldenbremse, an och géint d’Ophuele vun esou vill nei Scholde positionéiert. Besonnesch d’Pläng vun SPD a Gréngen hat hien an deem Kontext ëmmer nees ridiculiséiert.
