Op Nofro sot de Patrick Goldschmidt dem radio 100,7, et wier d’Reegel, Associatiounen ee Subside fir Anniversairen ze accordéieren.
Déi Decisioun hat am Stater Gemengerot ee Méindeg fir hefteg Diskussioune gesuergt. Och de Planning Familial huet kritesch dorop reagéiert.
Diskussiounen am Stater Gemengerot
Déi gréng Conseillère Claudie Reyland hat e Méindeg am Gemengerot d’Diskussioun iwwer de Subsid lancéiert. Si huet bedauert, datt d’Stad wëlles hätt, enger Asbl Suen ze ginn, déi sech géint d’Recht op Ofdreiwung asetzt.
“D‘Selbstbestëmmung vun der Fra ass an der DNA vun eiser Partei. Mee ënner kengen Ëmstänn loosse mir dëst duerchgoen, an ënner kengen Ëmstänn fanne mir, datt d’Stad Lëtzebuerg Vie Naissante a kenger Hisiicht soll ënnerstëtzen.”
Et géif net dorëm goen, ob een als Gemeng mat de Positioune vu Vie Naissante averstane wier, mee dorëm, datt een eng Associatioun eben net wéinst politeschen Differenzen ausschléisse kéint, sou d’DP Buergermeeschterin Lydie Polfer (DP) virun der Ofstëmmung ee Méindeg.
Dat huet och de Patrick Goldschmidt um Freideg am 100,7-Interview gesot.
“Mir kënnen awer net, well mer mat enger Associatioun net averstan sinn, bëssen ee System Trump aféieren a soen déi do gefale mer net, déi kréie keng Suen; Dat do, op där Positioun, dat ass ok an déi kréien eppes. Mir hu scho ganz vill Subsiden zesummen an der Gemeng decidéiert, fir Associatiounen déi international täteg sinn, national, wou mer villäicht net averstan woen.”
De Planning familial ass mat där Argumentatioun net averstanen.
Kriticke vum Planning Familial
An engem Communiqué um Donneschdeg den Owend gëtt vum Planning Familial betount, datt een déi fundamental Prinzippie Gläichberechtegung a Mënscherechter net ignoréiere kéint. Virun allem net, wann et dorëm geet, ze decidéiere wien ëffentlech Gelder kritt a wien net.
Hei géife reaktionär Positioune legitiméiert ginn, déi net deene géifen entspriechen, déi d’CSV-DP-Regierung géif vertrieden, esou d’Kritik vum Planning Familial.
De Patrick Goldschmidt preziséiert, datt et sech hei net ëm eng Ënnerstëtzung vun der Stad Lëtzebuerg fir Vie Naissante hir Cause géif handelen.
“Mir mussen och respektéiere wann et Leit sinn, déi soen, och do baussen an der Gesellschaft gëtt dat - mir sinn géint Avortement – do si mir villäicht net averstanen domat. Mir géifen där Associatioun ni e Subsid gi fir an deem Beräich méi ze maachen. Mir ginn hinnen hei fir warscheinlech e Gebuertsdagskuch, sou wéi wann se eppes géife maachen a se géifen ons en Éierewäi froen.”
De Planning familial wollt op Nofro net op d’Aussoe vum Patrick Goldschmidt reagéieren. De Verwaltungsrot vum Planning hätt decidéiert et beim Communiqué ze beloossen, huet et geheescht.
